Valen sjukehus vert etterforska av politiet
I forgje veke skreiv BT at politiet hadde starta etterforsking av Valen sjukehus etter ei uynskt hending på ei utflukt arrangert av sjukehuset.
Politistasjonssjef for Kvinnherad politistasjon, Sigurd Børve, sa då til BT at saka involverte to pasientar, der den eine vart utsett for ei uynskt hending. På det tidspunktet valde politiet å halda korta tett til brystet av omsyn til den fornærma pasienten.
Kjende ikkje retningslinjene
Annonse
I dag opplyser politiadvokat Eli Valheim til BT at det er ei seksuell hending som er meldt, og at pasientane har status som høvesvis sikta og fornærma.
Det er gjennomført ransaking hjå den sikta, og dei to pasientane og tilsette på sjukehuset er avhøyrt, skriv Valheim i ein e-post til BT.
Politiadvokaten opplyser også at overgrepet skal ha skjedd innandørs og at det ikkje skal ha vore vitne til det.
I fylgje BT var det fem tilsette med på turen, men ingen av dei skal ha hatt kjennskap til sjukehuset sine retningslinjer ved utflukter som inkluderer overnatting.
Annonse
Vidare skriv dei at fylkeslegen har anbefala etterforsking av sjukehuset. BT har fått delvis innsyn i vurderingane dei sendte til politiet.
Overgrepet skal ha skjedd i kjølvatnet av fleire mogelege kritikkverdige forhold knyta til sjukehuset sine retningslinjer for utflukter, ifylgje fylkeslegen:
- Tilsette kjende ikkje retningslinjene.
- Retningslinjene var mangelfulle.
- Det er usikkert om retningslinjene vart fylgde.
Vidare i brevet frå fylkeslegen skriv han at det var ikkje vaken nattevakt på den aktuelle utflukta, slik det er på sjukehuset. Det er også vanleg praksis at personalet sit oppe til alle har lagt seg.
Annonse
Svarar
Øvste leiar ved Valen sjukehus Marianne Lund Anderssen fortel til BT at ho ikkje var klar over fylkeslegen sine opplysingar om at dei tilsette på den aktuelle turen ikkje var kjend med retningslinjene.
– Det er klart at det er eit mål at alle skal kjenna til slike ting, seier Lund Anderssen til BT.
På spørsmål vidare om alle tilsette som er med på utflukter no har kjennskap til retningslinjene, svarar ho at det ikkje har vore fleire utflukter dette.
– Dei tilsette må bli kjend med retningslinjene dersom det skal bli fleire slike turar igjen, avsluttar ho.
