Vakna til nedbrente bosspann

«Flaks» er kanskje det mest dekkande ordet, sidan brannen i Neslia i Rosendal ikkje har fått konsekvensar for anna enn dei fire dunkane. Samtidig er hendinga skakande for Larsen Øyre, som sov natta gjennom, utan å vita om kva som føregjekk like utanfor huset deira.

Alle fire dunkane brann ned til ingenting, utan at Larsen Øyre fekk varsel om det.

Skremmande

– Det er veldig skremmande, spesielt når ein veit kva dette kunne utvikla seg til. Det var tett mellom bosspanna og garasjen, og der inne det står ein relativt ny elbil. Nabohuset er tett på, og det er halvannan meter mellom garasjen og vårt hus. Konsekvensane kunne blitt veldig store, fortel ho.

Rododendronen til naboen er svidd, nedløpet på hjørnet av garasjen har smelta i varmen og sotet på muren fortel sitt tydelege språk: Her har det vore varmt.

Bosspanna ligg igjen som ei elv av smelta plast som har kjølna til å stripe som strekker seg ned mot vegen i søre enden av Neslia. Alt som er att er nokre glas som låg i dunken for glas og metall. Resten er brent opp til ingenting.

Hildegunn var aleine i huset, og sov i andre enden av der det brann. Ho har starta å nøsta for å finna så mykje informasjon om hendinga som ho klarer.

– Eg har snakka med avisbodet. Han hadde passert 0430 i følgje sin logg, men såg ikkje flammar då leverte avis to hus bortanfor, og meiner han hadde lagt merke til det om det brann. Ingen naboar har sett noko eller oppdaga brann hos seg. Politiet går ut i frå at dette har skjedd på natta, mellom klokka 2330, då eg la meg, og 0430, seier Larsen Øyre.

Skadeverk

Politiet bad måndag om tips i saka, utan respons førebels, opplyser politistasjonssjef Sigurd Børve.

– Men me har fått melding om skadeverk i eit busskur i nærleiken, og det kan sjå ut som at det har skjedd i same tidsrom. Det kan vera nokon har informasjon å dela om det også, seier Børve til Grenda.

Han fortel at førebyggjande eining ved Kvinnherad brann og redning har vore på skulane og informert om blant anna konsekvensane av brannar, men han kan ikkje seia med sikkerheit at dei har treft rette gruppa.

– Viss det er påsett, noko som kanskje er mest truleg, så er det grunn til å vera uroa. Me har tidlegare i sommar også hatt einskildhendingar som har vore litt i same gata, så det er fornuftig at oppsitjarar snakkar saman og deler det dei har av informasjon, meiner Børve.