Vågar å vera etter Helsesista-besøk
Våg å vera, var oppmodinga då Tale Maria Krohn Engvik, betre kjent som Helsesista, snakka til både tenåringar og foreldre.
Publisert
I midten av oktober hadde Rosendal Helselag, Uskedal Helselag og Romsleg slått sine krefter saman for å få snapchatfenomenet Helsesista til å vitja Rosendal.
Der delte ho dagen i to; først ei totimarsøkt med ungdomsskuleelevane i skuletida og på kvelden tok ho ein runde med foreldra til dei same elevane.
Annonse
Tematikken begge plassar var å våga å vera, den store skilnaden var at Krohn Engvik hekta eit «foreldre» bak presentasjonen til kveldøkta.
Stort ansvar
Ho sprinta gjennom sin eigen bakgrunn for å koma til kjernen av føredraget: Kva som er kvardagen til ungdommane ho har kontakt med gjennom sin snapchatkonto, og kva desse ungdommane treng i kvardagen.
– Å vera ung no er annleis enn i dinosaurtida då eg vaks opp, sa 45-åringen frå Ålesund og peika på at det er mykje meir press og mobbing no enn då ho vaks opp.
Annonse
I salen i Rosendal Samfunnshus sat i all hovudsak foreldre til tenåringar, og Helsesista kommuniserte tydeleg til dei:
– De har eit kjempeansvar for å korrigera og snakka rett om det som er trakassering for ting ein ikkje kan gjera noko med, som kjønn, hudfarge, religion eller legning, sa ho då ho rådgav foreldra på fleire vis.
Ho oppmoda også dei til å følgja med på telefonane til barna, og vekte kanskje nokre med å forklara kor mykje mellom anna TikTok, Snapchat og Instagram påverkar dei.
– Begeistra
Bente Haugen i Rosendal Helselag fekk seg med seg begge føredraga til Helsesista, og er blitt begeistra for dama.
– På dagtid trefte ho ungdommane veldig god. Elevane har meldt tilbake at dei var veldig fornøgde med økta. Frå vår side var arrangementa vellukka, og me er veldig fornøgde, seier Haugen om besøket.
Annonse
Haugen peikar på at Krohn Engvik er tydleg på grenser og skjellsord, og kalla ein spade for ein spade, enten ho snakka til unge eller vaksne.
– Ho snakka om samtykke på dagøkta, og presiserte at det gjaldt heile livet. Til dei vaksne snakka ho om grensesetjing og det å ta tak i ting. Heilt i mi og mange andre si gate, meiner Haugen.
Haugen gler seg over støtta frå sparebankstiftinga og Romsleg, og rosar ungdomskulen for samarbeidet.
– Dette er god investering i framtida og i ungdommane. Me tar initiativ til nye foredrag, om me får til støtte slik me har gjort i år og i fjor, sluttar Haugen.
