Vaage med tingingsverk då Jepsen vart vigsla

Ved gudstenesta i Domkyrkja i Bergen på søndag vart Ragnhild Jepsen vigsla til biskop i Bjørgvin bispedøme av preses Olav Fykse Tveit.

– Ei fullsett kyrkje med nærvær av Hans Majestet Kong Harald fekk oppleva ei flott festgudsteneste, skriv prost Svein Arne Theodorsen i ei pressmelding etter vigslinga.

Kvinnherad-bidrag

Fleire kvinnheringar fekk ta del i innsetjingsseremonien, då soknerådsleiarane var velsigna med plass i domkyrkja. Frå Kvinnherad tok del Berta Haugland (Kvinnherad), Liv Slettemark (Husnes & Holmedal), Heidi Thomassen Sjo (Fjelberg & Eid), Grethe Revne (Ølve) og Oddrun Berge (Åkra) del.

Knut Vaage hadde fått oppdraget med å laga musikk til vigslinga. Tingingsverket «Sunniva kongsdotter» av Vaage vart framført som ei gåve til biskop Ragnhild Jepsen. Det var ikkje dei einaste musikalske bidraget.

– I gudstenesta var det mykje fin song og musikk, ikkje minst ein inspirerande salmesong, melder Theodorsen om bidraga til Bergen domkirke sitt jentekor, Bergen domkor, messingblåsarar og domkantorane Kjetil Almenning og Sigurd Øgaard.

Den nye biskopen heldt preike over dagens tekst om då den oppstadne Jesus møtte læresveinane då dei hadde vendt tilbake til fiskebåten og ikkje fått fangst, på Jesu ord fekk dei masse fisk. Biskop Ragnhild leia gudstenesta etter preika, m.a. nattverden som vart delt ut mange stader i kyrkja.

Begeistra prost

Prost Svein Arne Theodorsen gjev uttrykk for stor glede over bispevigslinga og lunsjen i Håkonshallen etter festgudstenesta.

– Her vart den nye biskopen ønska varmt velkomen. Eg merka meg med glede at mellom anna kyrkjerådsleiar Kristin Gunleiksrud Raaum og barne- og familieminister Kjersti Toppe trakk fram den nye biskopen si deltaking i Moster 2024.

Prosten melder at allereie komande onsdag kjem den nye biskopen til Sunnhordland med besøk på Halsnøy Kloster og Moster Amfi. I juni vil biskopen ordinera prest både på Bremnes og i Sveio.