Vaage Gartneri slått ut av lynnedslag: – Drifta blir nett som då pappa dreiv på 50-talet

Natt til fredag slo eit valdsamt lynnedslag ned like ved Vaage Gartneri på Sunde. Det slo ut klimacomputeren, som på mange måtar er hjernen i heile drivhuset.

– Den styrer lufting, varme, vatning, gjødsling og slikt. Utan den så betyr det at eg må gjera alt manuelt. Vatninga greier eg kanskje, men gjødslinga blir meir tilfeldig. For å regulera temperaturen må eg ned på kvelden og lufta manuelt. Så drifta blir nett som då pappa dreiv her på 50-talet, seier Ragnvald Vaage.

Gartneriet var godt sikra mot lynnedslag med alt av nødvendig utstyr. Likevel har det kraftige lynnedslaget kome igjennom og øydelagd deler for fleire hundre tusen kroner.

– Halvparten av boksane som skal ta i mot signalet er øydelagde. I tillegg er komfyr, oppvaskmaskin og alt på kjøkenet oppe i huset vårt gått. I sikringsskapet var det faktisk ikkje ei einaste sikring igjen, seier Ragnvald.

Kraftig smell

Agurkbonden registrerte berre to torebrak natt til fredag, men dei var til gjengjeld veldig kraftige.

– Eg vakna av det første, og eg har aldri høyrt eit så sterkt toreslag før. Då vart eg liggjande å døsa, og tenkte at det gjekk greitt, for det gjekk ingen alarmar. Men på det andre så kom både torebraket og lyset samstundes, så det har nok treft ganske så nærme, seier Vaage.

Det blir mykje ekstraarbeid for gartneriet dei komande vekene. Men Ragnvald håpar å få installert den nye klimacomputeren, som kom i postkassen i dag, snarast mogleg.

– Det vert mykje arbeid å fiksa alt. Men sjølv om fyrste holdet ikkje blir bra, der vi nok må rekna med litt avlingstap, så kan resten av året framleis bli veldig bra. Det er tre hold igjen endå, seier han.