Vaage Bryggeri blir tvangsoppløyst: – Arbeidsmengda vart for stor til at eg fekk det til å gå rundt.

I januar 2020 vart det kjent at Gaute Vaage frå Sunde kjøpte Mykle Mikrobryggeri, som fleire år tidlegare var etablert av Reinhard og Margit Lund-Mikkelson i Omvikdalen. 28. april same år endra bryggeriet namn til Vaage Bryggeri.

To og eit halvt år etter kom meldinga om at det lokale mikrobryggeriet no blir tvangsoppløyst.

– Det er fleire grunnar, skriv Gaute Vaage i ein sms til Grenda.

– Å drive eit bryggeri åleine og vera i jobb. Då blir det jobbing nesten heile døgnet rundt. Det går ikkje i lengda, legg han til.

Han samanfattar tida som kjekk, og understrekar at han har lært mykje. Arbeidsmengda vart likevel for stor til at Vaage fekk det til å gå rundt. At han byrja samstundes med korona og med at utestadane dimed var stengte gjorde det ikkje lettare, medgir han.

Skiftesamling i slutten av september

Det er Haugaland og Sunnhordland tingrett som har avgjort at buet til verksemda skal tvangs-oppløysast, i medhald av aksjelova § 16-15.

Avgjersla vart avsagt onsdag 31. august, og verksemda hamna i Konkursregisteret 1. september.

Fristdagen i oppløysinga er sett til 13. mai 2022, og krav i buet må meldast til advokat Bernt Huglen Vinsnesbakk innan 26.09.2022. Den første skiftesamlinga blir halde den 29. september i Haugaland og Sunnhordland tingrett på Stord.

Gaute har kjøpt Mykle mikrobryggeri