Vaage avgjorde med dobbeltrøyst
Ordførar Vegard Bjørnevik (H) var inhabil. Sidan resten av Formannskapet var delt på midten, vart varaordførar Thea Vaage (Ap) si dobbeltrøysta tunga på vektskåla.
Publisert
Attende i oktober vedtok Formannskapet at administrasjonen fekk fullmakt til å selja 50% av kommunen sina aksjar i Hydrogenvegen AS for 75.000 kroner til ny eigar. Etterpå er det kome ynske om at kommunen skal bruka pengane til tenestekjøp i selskapet, og dei har sendt ein oversikt over deira aktivitetar frametter. Der kjem det mellom anna fram at dei vil jobba for at det vert etablert ein fyllestasjon på Åmot.
I møtet 5. desember vart dette ynsket løfta til politisk behandling. Jostein Rødland (INP) har vore sterkt kritisk til Hydrogenvegen AS, og føreslo å ikkje løyva midlar til tenestekjøp.
Annonse
– Eg føler det mest er lobbyverksemd dei driv med, og det er berre tre kommunar som er med på dette. Eg har utførleg sag kva eg meiner om hydrogen som energiberar. Dette er å kasta 75.000 kroner ut vindauga. Dette er eigentleg berre løn til folk som har som hobby eller jobb å påverka, meldte han.
Motsett konklusjon
Per Harald Havnen Löfgren Johansen (Ap) var samd i mykje av kritikken.
– Dei 75.000 kronene bør vi bruka på andre ting, meinte han.
Annonse
Ove Lemicka var einig i noko av argumentasjonen, men kom til heilt motsett konklusjon. Han føreslo i staden at kommunedirektøren skulle få fullmakt til å inngå avtale om tenestekjøp innanfor oppgjerssummen av aksjesalet.
I røystinga fekk forslaga fekk fire røyster kvar. Sidan Vegard Bjørnevik var inhabil i saka, grunna at han er styremedlem i Hydrogenvegen AS, var det dobbelrøysta til varaordførar Thea Vaage som avgjorde. Ho røysta for Ove Lemicka sitt forslag, noko også Lemicka, Silje Nordtveit Olsen (SV) og Veronica T. Thorsen (Sp) gjorde. Det vart då vedteke.
