Uvanleg start på dagen for ettersøkslaget

Ein forbipasserande mopedist hadde ringt politiet etter at han oppdaga ein påkøyrd oter halvvegs ut i grøfta på Stripo ved Husnes. Politiet tok vidare kontakt med Tore Furdal i Kvinnherad Ettersøkslag.

– Oteren var framleis i live då han blei funnen, og mopedisten som melde i frå stod og venta der til eg kom. Men innan eg rakk fram var oteren allereie død, fortel Furdal på telefon.

– Kva gjorde oteren der oppe så langt frå sjøen?

– Den var nok litt på vidvanke, men otrar liker å søkja etter nye område. Dei fylgjer gjerne bekkar og elver og slikt på jakt etter nye stader å vera, dei kan også gjerne gå i ferskvatn, forklarer Furdal.

Aukande

Furdal meiner også at det er grunn til å tru at det kan vera ein aukande oterbestand i kommunen.

– Eg bur på Seimsfoss og har sett oter i Guddalselva fleire gonger, fortel han vidare.

Men éin ting er Furdal tydeleg på når det kjem til viltpåkøyrslar.

– Du har plikt til å melda i frå når slike ting skjer. Det gjorde ikkje dei som køyrde på oteren, og det er litt dumt, understrekar han.

Kva som no kjem til å skje med oteren er førebels uvisst.

– Det er jo eit fint dyr, kanskje nokon ynskjer å stoppa han ut? Men det er kanskje berre for litt spesielt interesserte, ler Furdal.