Utvidar demninga ved fonna - sjå biletserie

Svartedalsdammen ved Markjelke er i ferd med å bli utvida og styrka. Men no har arbeidet teke vinterpause.

Svartedalsdammen vart opphavleg bygd mellom 1970 og 1973. Men i vår starta eigaren Statkraft, med hjelp av Sweco, Norconsult og den lokale entreprenøren K. Hjelmeland AS, ei større oppgradering. Bakgrunnen er nye krav til tryggleiken. Difor vert det fylt på med stein på begge sider av demninga. Steinen vert henta lokalt i området.

– Vår prosjektleiar Anders Skaarer fortel at det no er vinterdvale på anlegget. Vi avslutta arbeidet der oppe som planlagt i midten av oktober. Dammen er ikkje ferdigstilt, slik det opphaveleg var planlagt, og det vil arbeidast med plastring også neste sesong, opplyser mediakontakt Knut Fjerdingstad i Statkraft.

 

Kunstverk

Då Grenda var ved Svartedalsdammen i midten av oktober, verka det som at innsida – altså inn mot Svartedalsvatnet – var ferdig plastra. Steinane var lagt på ein slik måte at det minna om eit vakkert kunstverk.

– Vi reknar med å starta på anlegget igjen i mai/juni som i år, sjølvsagt noko avhengig av snøtilhøva. Attståande arbeid neste år er plastring av dei siste 10 metrane på nedstraumssida og sjølve damtoppen, samt arrondering av steinbrot, anleggsvegar og riggområde. Det skal også etablerast ei ny bru over til lekkasjemålehuset, informerer Fjerdingstad.

Svartedalsvatnet ligg i Mauranger, nesten heilt inntil kanten av Folgefonna, om lag 840 meter over havet.