Utstilling med fokus på marin forsøpling i Guddal

Pippip Ferner har i mange år jobba med tema rundt marine organismar og deira sjansar til å overleva i eit hav som blir varmare, surare og blir fylt med plast og alle miljøgiftene som følgjer med plasten. Plasten bidrar til at artar blir trua og forsvinn raskare enn normal evolusjon. Det får dramatiske konsekvensar for naturen og havet si evne til å forsyna oss med ressursar som vi har teke som ein sjølvfølgje, skriv galleriet i ei pressemelding.

Kritisk utforsking av tekstiltradisjonen

I Galleri G Guddal vil Ferner visa prosjektet Plastic Revisited #3. I dette rettar kunstnaren søkjelyset på marin forsøpling - både på den synlege, men også på den vi ikkje ser – mikro- og nanoplast. Det er mange kjelder til dette og tekstilindustrien er ein av dei.

Difor er det mogleg ikkje overraskande at handverk- og tekstiltradisjon er med på å formgje verka som blir utstilt. Ustillinga består av vevde og strikka installasjonar, samt ein kleskolleksjon, kor alt er laga av plast som er funne i naturen.

Gjennom å utforska handverks-metodar innanfor tekstiltradisjonen belyser Ferner korleis utslepp av mikroplast knytt til dagens tekstilproduksjon er eit miljøproblem.

Installasjonane blir akkompagnert av fabulerande teikningar av marine organismar, heiter det i pressemeldinga.

Catwalk med elevar frå redesign

På opningsdagen vil elevar fra redesign på Rosendal Ungdomsskule delta på “catwalk” iført plastantrekk frå utstillinga. I forkant har dei hatt ein workshop med Ferner der dei lagar eigne arbeid og tilhøyr til antrekka av funne plast, inspirert av Ferner sine arbeid, skriv Guddal i pressemeldinga.

Elevarbeida vil seinare bli viste på Folgefonnsenteret.

Kleskolleksjonen som elevane skal vera med på å vise fram 21. mai består av fleire antrekk som er laga av plast funne langs veg og på strender. Mellom anna får publikum sjå ein kjole laga av munnbind, som er av plast, samt ein kjole laga av avfall frå fiskeriindustrien, som tau, restar av fiskegarn og liknande.

Plast

Kvart år finn 8 millionar tonn plast vegen ut i verdshava. I Norge hamnar det 34.000 tonn i Nordsjøen kvart år. Ein går ut frå at 19.000 tonn mikroplast blir sleppt ut i naturen, kor 1070 av desse tonna kjem frå tekstilar, og mykje av det ender opp i havet.

«Syntetiske fibrar utgjer no meir enn nesten 70% av den globale tekstilproduksjonen. Syntetiske fibrar er i prinsippet plast og sender billionar av syntetiske mikrofiber ut i havet ved tilverknad, vask og slitasje og som lett set seg fast i dyra sine fordøyingsorgan. Forskarar finn mikroplast i mange arter botnlevande dyr. Også i små krepsdyr - heilt ned til det minste plankton. Når forskarar finn igjen fiber som kanskje stammar frå treningstøyet ditt i magen på ein liten tangloppe på verdas djupaste havbotn, Marianergropa, så seier det sitt», kan ein lese i pressemeldinga.

Konsekvensen av denne maritime forsøplinga er at loppene blir tregare, latare, grev ikkje djupt nok i mudderbotn, klarar ikkje gøyma seg og blir fortare eten av fienden. Dersom den då ikkje døyr av plasten først.

«Vi slepp heller ikkje unna. I snitt får vi i oss plast tilsvarande eitt kredittkort i veka – utan at vi veit kva dette gjer med oss på sikt.»