– Utruleg tilfredsstillande å sjå at «Egget» flyt

Utviklingssjef Kristine Moldenhauer Biseth var nøgd med sjøsettinga, og glad for at alt gjekk etter planen.

MiniEgget er eit lukka oppdrettsanlegg med gjennomstrøyming, det vatn blir pumpa inn frå botn og silt før det blir slept ut. Men sjølv om denne første versjonen høyres ut som eit lite anlegg, er det ikkje så lite som det høyres ut som.

MiniEgget er 21 meter høgt og har ein diameter på 15 meter. Oppdrettsvolumet er på heile 1850 kubikkmeter vatn. Dette banar vegen for hovudprosjektet som skal ha ei høgd på 44 meter.

I sluttfasen med «MiniEgget»

Smertefritt

MiniEgget vart sjøsett med solid løftekraft frå Tronds Marine Service og fagfolk frå industriverksemda som har jobba med Egget i meir enn eitt år.

Operasjonen med å fylle Egget med vatn tok om lag to timar. Løftet skjedde klokka 9 på måndag morgon og det var på plass i sjøen 11.30.

Moldenhauer Biseth fortel til Kyst.no at operasjonen gjekk som planlagt.

– Saman med Tronds Marine og eit godt drilla «maskineri» av våre tilsette, haldt operasjonen tidsplanen og alt gjekk smertefritt. Egget vart plassert i sjøen til planlagt tid, og då dette var ein ny operasjon for alle involverte partar vil eg sei at dette var meget vellukka, seier ho.

Åsmund Hellesøy, som er teknisk direktør i Ovum, skriv på LinkedIn at dette er noko dei har jobba for lenge.

– Då er det ekstra godt å sjå at praksis stemmer med teorien, uttalar han.

20. juni var såleis ein merkedag både for Herde Kompositt og team Ovum, der heile operasjonen vart forskjønna med sol frå skyfri himmel og blikkstille sjø.

Egget-direktøren: – Milepåle for oss

– Stolte over å ha fått det til

Utviklingssjefen meinte det var tilfredsstillande å endeleg sjå Egget flyta, etter sju års planlegging og arbeid.

– Det har vore eit spanande prosjekt for oss og me har alltid sett fram mot dette. At me no har nådd målet og prosjektet er nær fullført, har gitt oss alle ei god kjensle. Det var veldig fascinerande å sjå det liggja i sjøen og flyta, no kan vi endeleg sjå isfjell-effekten på konstruksjonen. Mesteparten av Egget er jo no under sjø og er ikkje så ruvande som det var då det sto på kai her hos oss i Ølve, seier ho.

Då ho blir beden om å samanfatta jobben med prosjektet, seier Moldenhauer Biset at dei først og fremst er stolte over å ha fått det til.

Berekraft i fokus

– Dette har vore eit nytt prosjekt som har utfordra oss produksjonsmessig, samstundes som det har vore utruleg lærerikt. Me er stolte over alle våre tilsette, som har stått på frå første dag for å byggja Egget. Dei er ein fantastisk gjeng som gir gass og kjem med gode løysingar på utfordringane som dukkar opp undervegs. Det gjer at alle jobbar i same retning og mot same mål, seier ho, og held fram:

– Det same kan me sei om samarbeidet med kunden og alle underleverandørane. Alle har heile tida jobba mot same mål, og då har det blitt eit kjekt samarbeid frå første dag i prosjektet, sluttar ho.

Egget skal no plasserast på lokalitet Gjermundnes, der Prophylaxia skal stå for drifta.

– Eit spennande prosjekt å vera ein del av

Avduka «Egget» med brask og bram