Utflytta husnesing kan bli Vixen-vinnar - drøymer om å ta med dottera på ferie

– Eg heldt no på å detta av stolen då eg fekk vita det!, utbryt Christina Ygre Skorve då Grenda ringer.

Husnesingen bur no på Voss, med mannen Øystein og tre born. Ho har utdanning innan økonomi og administrasjon, men den viktigaste jobben hennar er å ta vare på dottera Nina på 16 år, og alltid vera i beredskap for ho.

– Nina er fødd med såkalla ukjent hjernemisdanning, og me fekk beskjed under graviditeten om at ho hadde ti prosent sjanse til å overleva. Heldigvis klarte ho seg, men det er mange sjukdomar som følgjer med denne misdanninga, så Nina må leva med 14 diagnosar, fortel Christina.

Vil få andre til å ha det betre med seg sjølv

Livet med ei dotter som må handtera både autisme, Cerebral Parese, gen-feil og alvorlege epileptiske anfall, er tøft. Kanskje nettopp difor er det nærliggande for Christina Ygre Skorve å villa normalisera vanskelege kjensler gjennom sine kanalar på sosiale medium.

– Det eg prøver å formidla i mine kanalar, er at om ein har mykje å streva med, og sit med vonde kjensler og tankar, så er ein ikkje aleine. Det er fort gjort å bli sjølvkritisk og tru at det er noko gale med ein. Eg vil få andre til å ha det betre med seg sjølv, forklarar ho engasjert.

Christina er i tillegg svært kreativ, og lagar mellom anna flotte maleri på dongerijakker. Då dottera Nina ville få ein jobb og tena sine eigne pengar, føreslo Christina at ho kunne perla smykke til sal. Dette førte etter kvart til eit eige firma.

– Planen var at Nina skulle perla smykke og selja, men så vart ho brått veldig sjuk, og kunne ikkje lenger perla. Då lova eg at eg skulle perla for ho, og tok til å leika meg med ståltråd. Plutseleg sat eg med eit englesmykke i hendene som eg syntest var verd å dela.

Eit symbol for nokon ein tenker på

Bilete av englesmykket vart delt på Christina sine kanalar, og ho fekk overveldande respons. Ho fortel at dei no vil selja slike englesmykke, og har starta bedrifta Ninus Design AS, oppkalla etter dottera sitt kallenamn.

– Engelen skal vera eit symbol for dei ein tenker litt ekstra på, anten det er nokon ein har mista eller nokon som har det vanskeleg. For meg er det ungane mine, Nina, Nicklas og Neah. Det er ikkje berre lett å vera søsken til ein som er alvorleg sjuk, fortel influensaren.

Det mest dramatiske som Nina strir med, er dei epileptiske anfalla. Når ho får eit anfall, må ho rett på sjukehus og leggjast i kunstig koma. Desse episodane har fått Nina inn i eit barne-palliativt team.

– Ordet palliativt betyr noko litt anna for born enn for vaksne. Det siktar eigentleg mest til at sjukdomen ikkje går an å bli frisk frå, og at det er forventa kortare levetid. Det er svært tøft som foreldre å ikkje kunna hjelpa dotter vår. Eg får klump i halsen no når eg snakkar om det, fortel Christina.

Ekstra anerkjenning

Den ferske semifinalisten er fødd og oppvaksen på Husnes, og flytta derfrå då ho var 16 år. Ho har framleis sterk tilknyting til kommunen, og mora bur på Husnes. No er Christina spent på om ho kjem vidare til finalen i Vixen som folkets favoritt.

– Det er ein siger i seg sjølv å vera i semifinalen! Konkurrentane mine har jo fleire hundre tusen følgjarar, så eg vart veldig overraska. Eg synest det er ein ekstra anerkjenning når det er folkets favoritt, for då er det folk flest som har stemt meg fram. Det håpar eg dei vil halda fram med, ler ho.

Når det gjeld smykkeproduksjonen har ho planar om å starta salet så snart som mogleg, før jul. Ho fortel at ho har to mål med verksemda si.

36-åringen saknar ein organisasjon som arbeider for born med alvorlege sjukdomar, slik Barnekreftforeningen gjer for born med kreft. Det nærmaste ho har oppdaga, er organisasjonen «Make a wish», som oppfyller eit ønske for alvorleg sjuke born.

Vil at Nina skal få vera med på ferie

– Eg tenkte med éin gong at dette er min organisasjon!, fortel Christina om då ho fann «Make a wish».

Og organisasjonen innfridde forventningane. Nina er svært musikalsk, og dei fekk ordna det så ho fekk oppfylt eit ynskje om å få syngja på scena ilag med bandet Vamp.

– Det var ei heilt fantastisk oppleving! Så eg vil gje litt av overskotet frå smykkesalet til «Make a wish», sånn at fleire kan få oppleva noko sånt, fortel Christina.

Det største målet, og drivkrafta bak bedrifta, er å få ta med Nina på ferie. 16-åringen får ikkje reiseforsikring frå forsikringsselskapa, grunna diagnosane sine.

– No vil me prøva å bygga opp ein økonomi som er sterk nok til at me kan reisa på ferie til Syden ilag. Dersom Nina må på sjukehus der nede, så er håpet at me skal få det til utan at me må selja huset, fortel Christina, og ler litt.

Kanskje kan ein finaleplass i Vixen bidra til at familien når målet.