Utanriksekspert sesongopnar i senioruniversitetet

Torsdag 7. september kjem NRK-veteranen Morten Jentoft attende til Kvinnherad senioruniversitet. Han gjesta også for to år sidan, då for å snakka om Finland. Denne gongen har han takka ja til å oppdatera om kva som skjer i Ukraina. Møtet er i Rosendal samfunnshus, og overskrifta denne gongen er «Kan det bli fred i Ukraina?».

Morten Jentoft, fødd i Bergen i 1956, er kjent som ein allsidig journalist og forfattar. Han snakkar m.a. samisk, russisk og finsk, og er mykje nytta i NRK som ekspert og utsend medarbeidar, m.a. i Finnland, Polen, Russland og no seinast i Ukraina.

– Alle har vel sett reportasjane hans dei siste to åra frå slagmarka i aust-Ukraina. Alltid er han imponerande godt orientert om kva som skjer. Han er språkmektig, og han har ei eiga evne til å koma tett innpå folk, og lagar gode intervju med både fagfolk, politikarar og folk i gata, meiner Steinar Haugan i Kvinnherad Senioruniversitet.

Jentoft har lang erfaring som NRK-korrespondent i Moskva, og kjem med heilt ferske inntrykk frå krigsherja Ukraina.

– Det skal bli svært spennande å høyre han snakke over temaet «Kan det bli fred i Ukraina?». Etter føredraget vert det som vanleg sosialt samvære og enkel servering. Senioruniversitetet er ope for alle som har lyst og høve til å møtast på ein torsdag føremiddag, helsar Steinar Haugan på vegner av styret i Kvinnherad Senioruniversitet og ynskjer vel møtt til nytt semester.