Usikker på framtida til mekkegarasjen
Det som var eit etterspurd tilbod av ungdommane, blir ikkje brukt nok. No er framtida til mekkegarasjen i Rosendal i fare.
Mekkegarasjen var eit nytt tilbod i regi av ungdomsbasen nord, som opna hausten 2022, etter at ungdommane over tid hadde uttrykt ønske om ein stad å møtast for å skru på mopedar og andre maskinar.
– Det starta bra med rundt ti ungdommar, men etter nyttår har det vore få som har nytta tilbodet, fortel Jon Steinar Vivelid.
Artikkelen held fram under annonsen.
Ventar på vêret
Vivelid er på plass på måndagar mellom 18 og 21 for å rettleia ungdommane som liker å skru og mekka.
– Eg hadde trudd det skulle vore fleire som nytta tilbodet, legg Vivelid til.
– Me har merka litt lite folk på ungdomsbasen også, kanskje ned i 10-11 nokre dagar, men no er me tilbake til å vera over 20 ungdommar, noko som er eit greitt tal med tanke på kor mange som soknar til denne ungdomsbasen. No når det lysnar og letnar i vêret, så kjem det gjerne fleire, vurderer leiar for ungdomsbasen nord Even Skåla Hansen.
– Dørstokken er ein høg terskel når vintervêret herjar, supplerer Skåla Hansen.
No er frammøtet på Mekkegarasjen så lågt at framtida til tilbodet står i fare.
– Det har ikkje vore vêr og føreforhold til å køyra moped til no i år, og samtidig er det få av tiandeklassingane som har rekt å bli 16, og dermed er det få som har lov til å køyra moped i det heile. Uansett, dei ti som i snitt var her i haust, veit om mekkegarasjen, og det er eit fantastisk tilbod som det hadde vore kjekt å få behalda, oppsummerer Skåla Hansen.
Mykje å skru på
Inne i mekkegarasjen står det ulikt som ungdom kan få fordjupa seg i. Dei har fått inn ein 750 kubikk motorsykkel, med delar og det heile, ein. Eit par plenklypparar har dei hatt til å mekka på, og nokre mopedar og crossarar står klare til å bli brynt på av tenåringar.
– Det er fint at ungdommane kan veksla mellom basen og mekkegarasjen, men me skulle gjerne sett fleire nytta seg av det.
Artikkelen held fram under annonsen.
To av karane som nytta seg av mekketilbodet då Grenda var innom på måndag, var Gaute Svendsen Andreassen og Torger Johan Koløy. 14-åringane er begge motorinteresserte.
Torgeir Johan prøver å få liv i ein gammal påhengsmotor.
– Han har ikkje starta på 30 år. Eg prøver å få gang på han. No har eg fått tak i ei ny bensinkopling. Når eg får montert den, så kanskje han vil starta, håper Torger Johan.
Men om påhengsen har venta lenge på å brumma, har kanskje berre våren på seg til å koma tilbake til fjorden.
Vigdis Gammelsæther, avdelingsleiar tiltak og ressurs ved eining barn og familie, fortel at ein har fått tilskot frå Gjensidigestiftinga til dette tilbodet.
– For midlane har me bygd opp lokalet og kjøpt inn utstyr til å ha der. Det ligg også litt personalmidlar i tilskotet, men skal me forsvara vidare drift på mekkegarasjen, må det brukast av ungdommen, seier Gammelsæther.
Ynskjer tilbod som blir brukt
– Me har midlar til ut skuleåret, det ligg fast, og så er det ei vurdering kva som skjer vidare. Me er opne for innspel, til dømes om å ha garasjen open andre dagar, om ein skal vinkla på andre måtar eller om det trengs samarbeid med andre, legg Gammelsæther til.
Ho hadde gjerne sett ungdomsbasen bli brukt meir også, men der har dei måtta stenga på torsdagar, grunna mangel på personell på den dagen.
Artikkelen held fram under annonsen.
Både Gaute og Torger Johan er litt på ungdomsbasen også, der dei gjerne spelar musikk og Playstation. Når dei blir 16 år, så er planen klar for begge.
– Eg skal ha lett motorsykkel, slår Torger Johan fast.
– Eg skal ha meg ein crossar, så eg kan køyra til hytta oppi Blådalen, kontrar Gaute.
Begge skal i alle fall køyra på to hjul når det blir mogeleg for dei.
Gammelsæther fortel at Kvinnherad er blant dei få kommunane som har bygd opp eit slik alternativ til ungdommane.
– Eg ønskjer at foreldre er bevisste på tilbodet, og legg til rette for at ungdommane som ynskjer det får brukt mekkegarasjen. Me er svært heldige og har med oss Jon Steinar Vivelid. Det er synd at hans kunnskap og engasjement ikkje blir meir nytta av skruinteressert ungdom. Spørsmålet er om me har bomma på interessa i Rosendal, det kan vera, men me har ønske om å byggja opp eit tilbod som blir brukt, sluttar Gammelsæther.