Urolege tider pregar kvartalsrapporten

Skatteinntektene aukar konsesjonskraftinntektene aukar, men kraftfondet går ned i verdi. At verda opplever urolege tider, pregar også den kommunale økonomien.

Dei som kunne føresjå både krig, rådyr straum og renteauke tilbake i november/desember 2021, ville truleg vore etla for endå større oppgåver enn å utarbeida kommunale budsjett. Når formannskapet får rapporten for andre kvartal til handsaming, er det då med justeringar i storleiken 51,6 millionar kroner.

– Kraftfond og rentekostnader er det som drar netto driftsresultat ned, konsesjonskrafta drar opp, grovskisserer økonomisjef Niels Jakob Erlingsson.

Fleire plassar aukar inntektene, opplyser økonomisjefen.

– Rammetilskot frå staten går ned fordi skatteinntektene våre aukar. Me får behalda ein god del av auken i skatteinntekter, rundt to tredjedelar av dei. Dette er ei eingongsinntekt grunna endring i skattereglane for utbyte. Netto er det snakk om ein auke i desse inntektene på kring 30 millionar kroner, men inne i dette talet er også forventa kompensasjon for koronakostnadane våre i 1. halvår, som var ca. 15 millionar kroner, opplyser Erlingsson.

Meir i konsesjonskraft

Sal av konsesjonskrafta til Kvinnherad kommune var opphavleg budsjettert med 41 millionar kroner i inntekt.

– Etter 1. kvartal auka me han noko, no aukar me budsjettet med nye 27 millionar, no opp til 105 millionar kroner, opplyser Erlingsson.

Kvinnherad kommune har 160,5 GWh i konsesjonskraft, som ein får kjøpt for 11,6 øre/kWt. 16 av desse gigawattimane nyttar kommunen til eige forbruk. Resten blir selt.

– Korleis ser det ut for salet av 2023-krafta?

– Det er ein strategi som blei lagt for nokre år sidan, der utgangspunktet er at ein sikrar seg for halve krafta. Me har sikra rundt halvparten i 2023-krafta, 86 GWh, til 70 million. Den andre delen som me ikkje har prissikra, får me ein betydeleg høgare pris for. Prognosane no ligg på 92 mill for dei siste 58 GWh, forklarer Erlingsson.

– Er ein nøgd med det ein får av konsesjonskrafta no?

– Når prisane går opp, så er ein alltid litt muggen på at ein går glipp av inntekter. Det viktigaste er likevel at me sikrar tenestetilbodet, og då må me av og til inngå langsiktige avtalar som gir føreseielege rammer. Investeringsutvalet ville ha ein føreseieleg situasjons i 3-4 år framover då strategien vart lagt. Me får gode prisar på det som ikkje er låst/sikra, og har 26 GWh igjen som me skal få mest mogeleg igjen for. 105 millionar kroner inkluderer ein prognose på dette, seier økonomisjefen.

Kraftfondet ned

Der kraftsalet gir kommunen inntekter, ser ein at det kommunale kraftfondet ikkje ligg an til å kasta av seg i år.

– Kraftfondet gjekk ned 2,89% i verdi i første halvår. Ved inngangen på 2022 var verdien på litt over 920millionar. Me ser at det har gått litt opp i frå 30. juni, men er framleis på negativ avkasting så langt i år. Me set det til 0 i bidrag frå for å sleppa å selja oss ned for å nå dei budsjetterte inntektene våre, seier økonomisjefen til Grenda.

Han noterer seg at driftsbudsjett viser at dei fleste er på budsjett, men også at omsorg ligg 6,9 millionar kroner over etter to kvartal.

– Ein jobbar godt for å koma i budsjett til årsskiftet, forklarer Erlingsson.

Formannskapet har kvartalsrapporten på sakskartet komande torsdag.