Uroa for høgare fartsnivå i sommar
Trygg Trafikk håper på synleg utrykkingspoliti når ein går inn i månadene som dei siste åra har dei med høgast frekvens av alvorlege ulukker.
Publisert
Sjølv om mange fryktar krevjande køyretilhøve om vinteren, er det ofte om sommaren det skjer flest alvorlege trafikkulukker. Med varmare vêr og tørre vegar, er Trygg Trafikk uroa for høgare fartsnivå og fleire moglege trafikkulukker langs vestlandsvegane dei næraste sommarmånadane.
– Me er uroa for at eit aukande fartsnivå og risikofull tullekøyring kan bidra til fleire ulukker framover, seier regionleiar Knut Olav Røssland Nestås i Trygg Trafikk Vestland.
Annonse
Flest omkomne i sommarmånadane
Trygg Trafikk oppmodar no trafikantane til å følgja fartsgrensene, og ber politiet om å prioritera mest mogleg kontrollverksemd i løpet av sommaren.
Perioden mai til og med august i fjor var sommarmånader med fleire omkomne i trafikken enn dei føregåande åra. Tal Trygg Trafikk har funne fortel at 66 omkom i perioden mai-august 2022, mot 37 drepne i same periode i 2021. I Vestland omkom 8 menneske og 29 blei hardt skadde i perioden mai-august 2022. Nestås fryktar no at dei komande sommarmånadane kan bli krevjande.
I perioden 2012-2021 var høg fart medverkande faktor til kvar tredje dødsulukke i trafikken.
Annonse
– Den enkelte trafikant er i stor grad med på å medverka til eigen trafikktryggleik og fartsnivået er ein viktig faktor, påpeikar Nestås i ei pressemelding frå Trygg Trafikk.
Han viser til at det er dobbelt så stor sjanse for å døy i ei trafikkulukke i 93 km/t samanlikna med 80 km/t, som er generell fartsgrense på vegar utanfor tettbygde strok.
Aksjonar
Trygg Trafikk ber no trafikantane i Vestland om å vera med på å påverka utviklinga i positiv retning ved å følgja fartsgrenser og køyra etter tilhøva. I tillegg oppmodar Nestås politiet til å intensivera kontrollverksemda i sommar.
– Me veit at politikontrollar er blant dei mest effektive trafikksikringstiltaka me har i verktøykassa. Det er difor positivt at Utrykkingspolitiet skal gjennomføra Aksjon grønne vegar gjennom sommaren, og så håpar me at dei lokale politikontora òg følgjer opp med fleire kontrollar. Ruskøyring og risikofull åtferd i samband med høg fart og manglande merksemd, utgjer ein vesentleg risiko i trafikken, avsluttar regionleiar i Trygg Trafikk Vestland, Knut Olav Røssland Nestås.
