Uroa for den lokale råderetten: Oppmodar folk til å sende inn svar på nok ei høyring vedrørande vindkraftutbygging

Den 9. juni la regjeringa ut ei høyring i samband med «forslag til endringar i fornybardirektivet, energieffektiviseringsdirektivet og bygningsdirektivet.»

Det er EU-pakken «REPowerEU» som er utgangspunktet for høyringa, som mellom anna kjem med forslag til tiltak som kan svara på unionen sitt ønske om ei raskare utbygging av fornybar energi.

– Denne høyringa legg dei ut midt i ferien, og dokumenta som presenterer forslaga blir i tillegg presentert på engelsk, på 34 sider med byråkratisk vanskeleg og tørt språk. Heller ikkje eit samandrag på norsk har dei lagt fram, fortel Mari Teigen Varanes i Aksjonsgruppa Nei til vindkraft i Kvinnherad oppgitt.

Fleire har reagert

At underlagsdokumenta i høyringa berre ligg føre på engelsk er det fleire som har reagert på.

– Det er utruleg dårleg, og dei har fått mykje kritikk for dette. Difor er høyringsfristen heldigvis blitt utsett frå 8. august til 22. august, seier Sven Løkeland.

Løkeland og Varanes har hatt ansvar for å setja seg inn i høyringsforslaga på vegne av aksjonsgruppa Nei til Vindkraft i Kvinnherad. Dei har no lagt til rette for at folk lettare skal få kjennskap til og forståing for innhaldet i «REPowerEU», slik at det er enklare å ta stilling til forslaga og koma med høyringssvar innan fristen.

Mellom anna er dei aktive på Facebook, kor dei mellom anna har laga ein mal ein kan nytta dersom ein vil levera høyringssvar, men ikkje veit heilt korleis ein går fram.

– Om ein ikkje veit heilt korleis ein skal formulera seg, er det jo også mogleg å berre skriva «Nei», tipsar Varanes.

Fryktar svekka påverknad, lokalt og nasjonalt

Aksjonsgruppa har sjølvsagt også kome med eit eige høyringssvar, der det mellom anna står følgjande:

Den 18. mai i år lanserte EU planen «REPowerEU». Eitt dei overordna måla med planen er å straumlinjeforme «rammeverket for godkjennings- og løyveprosessar for prosjekt for fornybar energi» (kommisjonens anbefaling artikkel 292 pkt. 5), som inkluderer søknadar, behandling, iverksetjing og utbygging av vindkraftverk på land og sjø. Ein ønskjer å korte ned behandlingstida til 1-2 år. Dette vil mellom anna innebera sterkt avgrensa tid for lokal påverknad og deltaking.

Aksjonsgruppa understrekar vidare at dei stiller seg kritiske til sjølve planen, samt til prosessane som blir nytta for å skaffa løyve – prosessar som dei hevdar er med på å svekke den lokale og nasjonale påverknaden og innflytinga på slike saker.

Fylkestinget held møte i Rosendal

Kvinnherad er allereie peikt ut

Medlemmene i aksjonsgruppa er uroa for at Kvinnherad, som tidlegare har blitt trekt fram som eit godt eigna område for vindkraft, igjen vil hamna i søkjelyset for utbygging av vindkraft på land.

– Går dette gjennom vil det føra til at ein får mindre lokal påverknadskraft til å vera med å bestemma. Slik vi forstår det vil det ikkje vera dei same krava til konskvensutgreiing dersom områda ligg innanfor det dei kallar «go to-areas», noko Kvinnherad igjen kan koma til å gjera dersom denne høyringa får gjennomslag. Makt og mynde vil bli teke frå oss, seier Løkeland.

Varanes legg til at slike hastige avgjerdsler kan få store konsekvensar den lokale naturen og miljøet dersom ein reduserer krava til konsekvensutgreiing.

– Her i Kvinnherad har me bidrege med vasskraft og ofra mykje natur allereie. Det beste ville vore å først utbetra vasskraftverka, understrekar ho.

Håpar på reprise

Då Nasjonal rammeplan frå 2019 vart vedteke, kom det svært mange høyringssvar frå Kvinnherad. Dette ønskjer aksjonsgruppa å få ein reprise på.

– Me har skrive høyring og laga ein mal for korleis folk kan skrive sine høyringssvar. Sjølv har me lese og sett oss inn i saka. Men blir det alvor må me setja i gong med lokale aksjonar, seier Løkeland.

– Ja, sist gong hadde dei mange høyringssvara ein verknad. Og det er viktig å presisere at det er betre å skrive «nei» enn å ikkje skriva noko, sluttar Varanes.

Ynskjer raskare utbygging

Forslaga i REPowerEU er ifølgje høyringsbrevet i tråd med EU sine ambisjonar om å gjera seg uavhengige av energiimport frå Russland.

På regjeringa sin nettstad heiter det mellom anna at «høge energiprisar har også bidrege til eit større behov for energieffektiviseringstiltak og ein raskare utbygging av fornybar energi.»

Her kan ein lesa heile Høyringsbrevet som ligg føre.

Annemor snakkar med utestemme: – Det må vel finnast nokon som har respekt for høgsterett?