Uro kring tilskot

Mykje av drifta er i balanse, men helsetenester og integrering vert dyrare enn venta.

Som vanleg hadde økonomisjef Niels Jakob Erlingsson ei økonomisk orientering i kommunestyret. På minussida trekte han fram stort meirforbruk på fastlegar, samt kostbart innleige av helsetenester på grunn av auke i ressurskrevjande brukarar. Det er også stor auke i kostnader knytt til integrering av flyktningar.

– Vi har ei aukande uro om kor vidt tilskotet frå IMDi (Integrerings- og mangfaldsdirektoratet) er stort nok til å dekka kostnadane, åtvara økonomisjefen.

På plussida kan det nemnast at kraftfondet har vakse med 6,87% hittil i år, tilsvarande 66 millionar kroner. Fondet er no verdt litt over 1 milliard kroner. Skatteinngangen har auka med 4%.

Lønskostnaden utgjer den største delen av dei kommunale kostnadane. Per mai er det bokført følgjande løn hjå dei forskjellige sektorane: Samfunnsutvikling 14,6 mill. (noko som er nesten 3 mill. lågare enn budsjettert), Oppvekst 169,1 mill. (som budsjettert), Omsorg, helse og sosial 236,6 mill. (som budsjettert), Teknikk og miljø 35,2 (0,5 mill. lågare enn budsjettert), og Administrasjon 16,5 mill. (0,7 mill. lågare enn budsjettert).