– Unødvendig og umusikalsk

Leif Sverre Enes (H) er sterkt kritisk til forslaget om auka stillingsprosent for varaordføraren. Han reagerer spesielt på timinga, men meiner òg at det er eit unødvendig forslag.

Forslaget frå fleirtalspartia er datert 14. mars, altså to dagar etter at «unntakstilstanden» vart innført.

– Eg synest det viser dårleg dømmekraft, og er så umusikalsk som det kan få blitt når vi no er inne i ein stor dugnad, og ein del innbyggjarar kjem til å hamna i økonomiske problem. Høgre kjem til å røysta imot dette forslaget så det synge etter, kommenterer Leif Sverre Enes.

Motstanden hans er ikkje berre grunngjeve med koronasituasjonen.

– Hittil har varaordføraren hatt 15% stilling, og dei har trass alt fått gjort noko då òg. Dessutan har vi nett tilsett næringssjef. Forslaget er såleis fullstendig unødvendig. Dette burde dei spart seg, melder Enes.

 

 

– Kvinnherad må vera offensiv

Påtroppande ordførar Hans Inge Myrvold (Sp) meiner det finst mange grunnar for kvifor det er ein god idé å utvida jobben til varaordføraren.

– Forslaget har ikkje bakgrunn i situasjonen no, det handlar i staden om å rekka over alle dei gjeremåla som kommunen er nøydd til og som vi blir invitert til, rett og slett å henga med på alt som skjer, svarar Hans Inge Myrvold når han høyrer kritikken frå Leif Sverre Enes.

Han viser dessutan til kommunereforma, som Høgre har stått i spissen for. Myrvold opplyser at den nye storkommunen Alver har varaordførar i 60% stilling, medan Øygarden har sin i 80 eller 100%.

– Vi ser at dei store kommunane rundt Bergen stel mykje merksemd, både regionalt og nasjonalt, fordi dei er offensive. Vi vil at også Kvinnherad skal vera ein offensiv kommune. Det handlar mellom anna om arbeidsplassar og busetnad, og skal vi klara å nå over alt dette, så må vi setja inn ressursar. Ordføraren åleine må heile tida prioritera knallhardt på kva han skal bruka tida på, seier Myrvold.