Unødvendig mange norskkarakterar

Ut frå det som kom fram etter ein prat med nokre av ungdommane der, kan det ikkje seiast at innhaldet i kampanjen hadde særleg stor relevans. Det var likevel semje om at nynorsken måtte bli.

Solfinn Kolle (17), Emil Hauge (17), Bartek Krakus (16) og Robert Naumenko (17) går alle på studiespesialiserande ved KVV. Dei hadde ikkje høyrt om FpU sitt stunt, og vart difor først introdusert for innhaldet i denne på ein kortfatta måte.

– FpU har laga ein kampanje for skulevalet, der bodskapen er «Fuck nynorsk». Det er likevel ikkje naudsynt nynorsken, men sidemålet dei vil til livs, då dei meiner at elevar ved vidaregåande har nok med karakterane dei får i norsk hovudmål.

Vil lære begge, bli vurdert i ei

Ungdommane lytta tenksamt til dette og fekk spørsmål om kva dei tykte om nynorsk, sidemål og karakterar. Sjølv om det første svaret var «eg veit eigentleg ikkje», hadde dei nokre kloke tankar å dele i saka.

– Det kunne vore slik at ein fekk ein karakter for nynorsken, så kunne me lært sidemål òg, utan å få karakter i det. Eventuelt kunne me berre fått karakter i munnleg sidemål, meinte Robert.

Solfinn tenkte i liknande banar.

– Eg er på ein måte einig med dei i det om sidemålet. Neste år skal me ha fire karakterarar i norsk, og det hadde nok ikkje vore naudsynt. Der kunne ein ha trappa ned på karakteren i sidemål, meinte han.

Dei fire ungdommane er alle registrert med nynorsk som hovudmål. Audun Bjelland ved KVV kunne melda om at storparten av elevane ved Kvinnherad vidaregåande er meldt opp med nynorsk som hovudmål.

– Elevane vel målføre når dei startar her, og ut frå dette opplev eg at nynorsken står sterkt her hos oss. Eg har eit inntrykk av at det er slik elles i distriktet her òg, fortalte han.