Unntak frå smittekarantene skapar sterke reaksjonar: - Dette er hakkande gale

Tidleg i desember kom regjeringa med ein oppdatering om smittevernkarantene. Mellom anna at barn sleppe karantene ved smitte i klassen. Måndag 27. desember la regjeringa fram at tilsette i skular og barnehagar får unntak frå smittekarantene i arbeidstida. Dette har skapt sterke og forskjellege reaksjonar.

– Dette er hakkande gale, seier Solfrid Medhus, lærar ved Halsnøy skule.

– Med slike reglar kan lærarar vera nærkontakt med mange elevar, undervisa i fleire klassar kvar dag, møta hundrevis av elevar, men ikkje henta sin eigen unge i barnehagen. Ein kan heller ikkje gå i butikken å handla, men på jobb kan ein vera. Eg har full forståing for at dei ønskjer å halda skulane opne, men kva med oss? Kva med dei me eventuelt kan utsetja for smitte? Me blir samstundes fråteken fritida vår, då disse reglane kan innebera fritidskarantene i lang tid framover, sukkar Medhus.

– Kvifor skal det vera annleis for oss?

Vedtaket trer i kraft 1. januar 2022, og inneber at tilsette som har vore i nærkontakt med ein smitta kan gå på jobb, men må teste seg døgn 3 og 7 etter nærkontakten. Men unntaket gjeld ikkje dersom dei tilsette er i same husstand eller tilsvarande nær den som er stadfesta smitta.

– Eg meiner me må ha det slik som før. Om det oppstår smitte i klassen, må ein i karantene. Det er jo slik elles, så kvifor skal det vera annleis for oss? Er du nærkontakt så er du nærkontakt, og då må ein halda seg heime, seier Medhus som håper regjeringa vil snu på dette.

Mange nærkontaktar i barnehage

Einingsleiar Jeaneth Sundal Rangsæter i Omvikdalen barnehage meiner det er viktig å stola på helsemyndighetene sine val.

– I barnehagar og skule har vi mange nærkontaktar. På gult nivå er det noko avgrensa, likevel er det frykt for å smitta nokon eller å bli smitta på jobb. Nokre har kanskje nære og kjære som er i risikogruppa eller ein er det sjølv. Eg trur vi alle er redde for å vera den som dreg smitten inn i barnehagane og skulane. Ein er redd for å smitta andre, noko som kan vera belastande for oss tilsette. Men for å halda hjula i gang må ein våga å stola på helsemyndighetene sine val, seier Sundal.

– Kva tenkjer du om at tilsette i skule og barnehagar vert unnateke frå smittekarantene i arbeidstida?

– At ein nyttar fritida si i karantene vil sikkert for mange opplevast meiningslaust. Eg tenkjer om ein kan hindre nokon i å bli smitta er det ein dugnad vi står i der og då. Det er vanskeleg å beskytta seg sjølv i ein pandemi i skule og barnehage. Dei små barna treng omsorg og vaksne nær seg heile tida. Skal barnehagar og skule vera opne må dette vera ivareteken. Vi må normalisere kvardagen best mogleg, og det er vi gode på.

Stor belastning

Samstundes meiner ho dei tilsette forten ros for jobben dei gjer, og for å vera positive og løysingsorienterte til endringane som stadig kjem.

– Tilsette gjer ein utruleg god jobb med å ivareta barna og er fleksible med å få dagane til å gå opp når det er mykje sjukdom. Barnehagetilsette har i desse tider fått fleire ulike roller enn det som står i deira stillingsinstruks. Dei fungerer som helsepersonell og reinhaldarar i tillegg til sine daglege arbeidsoppgåver, fortel ho og held fram:

– Det har som nemnd allereie vore stor belastning på barnehagetilsette grunna høgare sjukefråvær. Gode vikarar er verdifulle og er viktig for barnehagedrifta. Opne barnehagar og skular er nøkkelen for å halda andre yrkesgrupper i gang. Tenk så viktige vi er, sluttar ho.