Unge i arbeid

Niandeklassingane på Rosendal ungdomsskule har denne veka fått prøvd seg i ulike jobbar. Dei har jobba i alt frå barnehagar til butikkar, og alle er einige om at arbeidsveke er ein bra ting.

Kjekk stranddag

Andreas Haugse og Marcus Oftedal hjelper til i Dønhaug Gardsbarnehage. Tysdag hadde dei stranddag. Dei er stornøgde med jobben deira.

– Det har vore veldig kjekt å ha arbeidsveke i barnehagen. Vi har leikt i sandkassa med barna, og bygd eit stort sandslott, seier Marcus.

– Verdas største, roper barna, og gutane ler.

Dei kjem rett frå stranddag, der dei har funne krabbar og leikt i fjøra. Begge er einige om at dette er den beste jobben.

– Eg valde jobben fordi mamma jobbar her, og vi gjekk i denne barnehagen begge to, seier Marcus.

– Ja, det blir ein kjensle av nostalgi. Det er godt å vere tilbake, legg Andreas til.

Begge er einige om at det har vore lærerikt å ha arbeidsveke i gardsbarnehagen.

– Vi har lært å kommunisera betre med barna, fortel Andreas.

– Og vi har lært å bygge sandslott, flirer Marcus.

Det er tydeleg at dei har kost seg ilag med barna.

Dønhaug Gardsbarnehage går mykje på tur, og dei har mange dyr på området. Leiar Helene Huse Bjørnebøle fortel at ho synes det er bra at elevar får ha arbeidsveke.

– Det er veldig kjekt at desse to gutane har lyst til å jobbe hos oss. Det er til god hjelp med nokon ekstra leikekameratar, seier ho.

– Dei har vore gode førebilete for barna, legg ho til.

Sitje i kassa

Medan Andreas og Marcus var i barnehagen, nytta Tilde Leganger sjansen til å jobba i butikk.

– Eg tykte at eg ville prøva litt og sjå korleis det er å jobbe i butikk, og sjå om dette kanskje kunne vera ein framtidig sommarjobb, seier Tilde Leganger.

Ho fortel at ho har arbeidd med å trekke fram chips, godteri og brus.

– Eg har lært mykje og fått ulike oppgåver som å setje på plass og trekke fram produkta slik at det ser meir ryddig ut. Det å sortera synest eg er veldig tilfredsstillande, legg Tilde til.

Nikolai Hauge Brekke jobbar på Coop Prix denne veka. Trass i lange dagar med å stabla varer, er han svært nøgd med valet av jobb.

– Det har vore spennande å få jobba her på Coop. Eg synest at det er kjekt å vera i butikken og få gjere ulike oppgåver, som rydding og å setje varer på plass. Eg skal kanskje også få lov til å prøva meg litt i kassa i morgon, seier Nikolai som synest det har vore ei lærerik veka, og det er ein jobb han vil anbefale til andre.

Lærerikt arbeid

Marius Andersen Joa har fått vera med å hjelpe til hos Dekkservice Vest i Rosendal. Der har han fått vera sosial og har lært mykje om korleis maskinar fungerer. Han har også byta mange dekk.

Arbeidsgjevar Mikal Skåla er takksam over at Marius hjelper til i bedrifta.

– Det er mange ulike arbeidsoppgåver, og Marius har vore til god hjelp, seier Mikal.

Han legg òg til at han gjerne ynskjer at fleire elevar søker arbeidsveke der til neste år.

– Det er ein kjekk jobb og eg synest at det har vert veldig lærerikt å få jobbe her, seier Marius.

Han fortel at grunnen til at han valde jobben til arbeidsveka var at ein venn av han jobba der først.

– Eg visste også kven Mikal var frå før av, og eg syntest at denne jobben virka interessant. Det er ein veldig gøy og sosial jobb. Det er fint å få jobba litt med hendene, legg Marius til.

Tekst: Kaylah Bermillo Stensletten og Ebba Hermann Fossli