Ungane fekk vera sjef

Pia fortel med stor entusiasme korleis ho hadde det på Modige talent. Nokre av grunnane til at ho saknar aktivitetstilbodet er at ho fekk mange nye vener, ho lærte mykje og hadde det dessutan veldig gøy. Hadde Pia hatt ordføraren på tomannshand hadde ho sagt følgjande:

– Men kom igjen då! Kvifor kan det ikkje berre starte opp att?! Det er jo liksom verdas beste aktivitet!

Pia er ei aktiv jente på fritida, og deltek på ei rekkje organiserte aktivitetar. Men Modige talent var den eine aktiviteten der borna sjølv fekk bestemma, medan dei vaksne fungerte som støttespelarar, og la til rette for at det endelege showet skulle bli så bra som mogleg.

– Alt var gøy! slår Pia fast.

Mamma Merethe Normann, som stilte opp som sminkør på showet, har også berre positive ting å sei om tilbodet.

– Alle samarbeidde på tvers av alder, og ungar vart dessutan kjend med kvarandre og utvikla venskap på tvers av bygdene i kommunen. På øvingane lærte dei seg å samarbeida, noko som er utruleg viktig lærdom elles i livet òg. Dei vaksne som styrte det heile var fantastisk flinke til å inkludera alle, sjølv oss foreldre. Det var heilt spesielt, me vart nesten som ein stor familie, fortel ho, før ho og Pia held fram med å forklare korleis dei opplevde tilbodet.

Enorm tru på Modige talent

Drive fram av deltakarane

Deltakarane fekk sjølv vera med å bestemme kva innslag sceneshowet skulle innehalda, samt om dei ville dansa, syngja eller framføra noko anna. Det var også ungane som bestemte kva kostymer dei skulle ha, og korleis kulissane skulle vera. Karianne og dei andre vaksne gav råd og hjelpte ungane til å jobbe fram deira eigne idear på ein god måte.

Merethe unner alle born i kommunen å få utfalda seg kreativt på denne måten, og håpar at det vert mogleg å få tilbodet i gong att. Veslesøstera til Pia, Lotta (6), er ei av dei som er klare til å bli med, og at søstrene er entusiastiske jenter med mykje glede å gi til eit publikum, er umogleg å ikkje leggja merke til.

– Me i foreldregruppa kan jo alle bidra med vårt, men det trengs dyktige fagpersonar til å styra aktivitetane. Kvinnherad kulturskule er knallbra, men skal du ha fleire ungar der er det ganske dyrt. Modige talent var jo gratis, og såleis heilt unikt. Eg kjem faktisk ikkje på ein einaste aktivitetstilbod i Kvinnherad som ikkje kostar noko. Finst det andre gratis tilbod? legg Merethe ut, medan Pia har funne seg til rette ved det vesle pianoet i loftsstova.

At Pia elskar å stå på ei scene vert dernest krystallklart. Ho finn fram gitaren til fotoseansen, og føreslår vidare at ho kan slå hjul på eit bilete. Fotografen har ingen innvendingar mot forslaga, og åtteåringen demonstrerer med det at ho ikkje berre er modig og har talent, men at ho også har utvikla ein eigen teft når det kjem til regi.

Tar dei gode erfaringane med vidare

Utruleg gøy

Bea Røssland-Telset (13) frå Husnes var også blant deltakarane på Modige talent. Som Pia, er også Bea full av godord for korleis ho opplevde tilbodet.

– For meg har det betydd veldig, veldig mykje å kunne gå til noko som ein verkeleg gledde seg til. Ein møtte dessutan veldig mange kjekke folk, fortel ho.

Ho vart klar over tilbodet då ho såg ein plakat som hang på barneskulen, og ho tenkte straks at dette var midt i blinken for ho, og at ho hadde skikkeleg lyst å bli med. Sjølv på informasjonsmøtet fekk ungane utfalda seg slik dei ville på scena, og der frå vart det berre betre og betre. Bea gledde seg både til øvingane og til showet, og boblar om lag over når ho snakkar om tilbodet.

– På Modige talent fekk me gjera ting i vårt tempo, og vi fekk gjera det vi ville og det vi var gode på, seier ho vidare, og understrekar kor fint det var at arbeidet med showet var styrt av ungane sjølv.

For ei stund sidan var ordføraren på besøk på Undarheim skule, og då nytta Bea høvet å spørje han om det ikkje var mogleg å starte opp att.

– Eg sa til han at mange likar fotball og handball, og mange likar å stå på scenen. Men det er ikkje alle som får stå på ei scene, for det er ikkje så mange slike tilbod her. Det kosta heller ikkje noko å gå på Modige talent, så det var jo også veldig bra.

Vidare formidla Bea at ho verkeleg håpa at det ville bli mogleg å få gjera noko sånt igjen. Hans Inge Myrvold, som var til stades på førestillinga, svara ho då at han òg hadde veldig lyst å få det til.

– Modige talent er noko av det kjekkaste eg har vore med på, avsluttar ho.

Kravd at kommunen må drifta eventuell vidare satsing