Ung kvinne tiltalt etter trafikkulukke

19. juli i fjor mista Emma Weberg Kaldestad (18) livet etter ei tragisk trafikkulukke mellom ein skuter og ein bil på Baugstranda.

No har statsadvokaten tatt ut tiltale mot bilføraren, der «uaktsom forvoldelse av død» er det alvorlegaste punktet.

Det skriv Bergens Tidende onsdag kveld.

I følgje tiltalen meiner påtalemakta at bilen skal ha kome over på feil side fordi sjåføren «betjente bilens friskluftsanlegg og/eller betjente andre elementer». Samtidig meiner dei at farta skal ha vore ein stad mellom 91 og 103 kilometer i timen i 80-sona.

Til avisa seier politiadvokat Harald Bilberg at det ikkje er ein grovt og bevisst brot på vegtrafikklova.

– Dette er ein type tragedie som kan råka dei fleste som er ute i trafikken, og det er berre taparar i ei slik sak. Marginane er små, trafikkbilete kan endra seg på få sekundar og er ein umerksam kan det gje katastrofale følger, seier han til avisa.