Unesco-delegasjon vitja Kvinnherad

Ein delegasjon med to utsendingar frå Unesco og eit fagråd frå Universitetet i Bergen er i desse dagar på ein besøksrunde i Sunnhordland.

Besøket er eit ledd i at Geopark Sunnhordland søkjer om medlemsskap i Unesco Global Geoparks. Første stopp i Kvinnherad var Halsnøy Kloster. Her stoppa delegasjonen for omvising og lunsj. Forutan eit fagråd beståande av tre geologar og ein arkeolog frå Universitetet i Bergen, dei to Unesco-representantane, var også dagleg leiar i Geopark Sunnhordland, Brynjar Stautland, og Linda Øen, direktør ved Sunnhordland Museum, til stades.

– Delegasjonen har eit tett program, seier Brynjar Stautland, som er vert for gruppa.

– I løpet av ei lita veke skal me innom heile Sunnhordland. Søknaden om medlemskap i Unesco vart sendt i 2021, og besøksrunden nå er del av denne søknadsprosessen, der målet er å bli eit Unesco-sertifisert turistmål, legg han til.

Feltarbeid i Sunnhordland

Rolf Birger Pedersen, professor i geologi ved Universitetet i Bergen, fortel at dei i mange år har sendt studentar på feltarbeid til Sunnhordland.

– Me har brukt Sunnhordland som geopark i mange år. Nå er målet å utvida denne til å bli ein offentleg geopark. Me arbeider for å visa korleis landet vårt er blitt bygt opp geologisk. Geologien styrer topografien, dvs. landsskapsformene, og han styrer jordsmonnet. Ved Halsnøy Kloster har ein endemorene frå istida skapt dei spesielle tilhøva som finst i dette området, og som har påverka det gode jordbruket som ein finn. Mineralressursane har blitt utnytta i generasjonar her.

– Kva betyr statusen som global geopark?

– Geoparken har som målsetjing å gjera funna sine best mogleg kjende for andre. Ved at geoparken vert internasjonalt anerkjend, vil han bli vidareutvikla og vedlikehalden. Sunnhordlandsregionen har særeigne kvalitetar internasjonalt, og viser viktige geologiske prosessar, noko som er viktig for forskinga. Dermed vert regionen også viktig for Unesco, som ønsker å visa korleis samfunnet er bygt på geologien og bergartane.

Mange besøksmål

Linda Øen har vore saman med delegasjonen både ved Sunnhordlandstunet og Halsnøy Kloster. Desse to lokalitetane tel med blant mange stadar som får besøk av gruppa i Sunnhordland.

– Klosteret har vore eitt av besøksmåla til delegasjonen på denne visningsturen. Dei ulike områda i Sunnhordland som vert besøkt, viser korleis folk har gjort seg nytte av dei geologiske ressursane, seier ho.

Brynjar Stautland leiar troppen ned til klosterbrygga. Der ligg RIB'en som dei kom med frå Stord, og som syt for hurtig transport mellom dei ulike punkta på reiseruta i øyriket. Tidlegare har Austevoll og Bømlo vore besøkte. Etter Halsnøy Kloster står Etne for tur, mellom anna for å vitja Langfoss. Elles står Sunndal og Skorpo på det vidare programmet i Kvinnherad, til liks med Bondhusdalen, Folgefonnsenteret og Kvinnherad Kyrkje i Rosendal. Etter dette ber det vidare til Tysnes, til blant anna Onarheim og gruvene i Ølve. Vergudane har tydeleg spela på lag med delegasjonen, som får sjå Kvinnherad og Sunnhordland på sitt beste frå orkesterstaden i ein open RIB.