– Tydlegvis leverer me

Prisen blir delt ut av Posten kvart år til dei beste butikkane med Post i Butikk i kategoriane stor, mellomstor og liten. Rosendal stakk av sigeren i kategorien mellomstor, og Hatlestrand i kategorien liten. Ein av kvalifikasjonane for å trona øverst er blant anna heilt feilfri historikk.

– Dei måler heile tida om det blir gjort feil, alt går jo på dataen, anten om me tek feil porto, utlevering av personlege ting, kundeklagar eller andre ting. Dei fylgjer med på alt og har ein kvalitetsmålingsstatestikk. Det ligg jo fleire butikkar i toppen, men det skal veldig lite til før du dett ned. Men me har altså 100 prosent på den statestikken, forklarte postansvarleg ved Eurospar Rosendal Liv Lunde.

– Dei ser også på både kompetanse og kvalitet. Ho frå posten sa at dei vektla blant anna alle kursa me har teke. Det er stadig nye ting som kjem, og me prøver å halda oss oppdaterte, la Lunde til.

Levande bevis

Lunde fortel at ho har vore med i gamet lenge, også før ho kom til Eurosparbutikken i Skålagato.

– Eg har jo vore med ei stund, og då er det lettare å halda seg oppdatert når ein driv med det ofta. Men me er jo fleire som er her, og eg er meir imponert over at dei som spring fram og tilbake klarer å halda tritt, sa ho.

– Korleis kjennest det å vinna dette her?

– Det er jo kjekt at det er gjort ein god jobb, svara Lunde.

Butikksjef Atle Nygård er også nøgd med det gode skussmålet dei har fått.

– Dei er jo eit levande bevis på at me gjer det me kan, sa han kort og godt.

– Tydlegvis leverer me her i kommunen, la han til lattermild då han fekk høyra at også Spar Hatlestrand vann same prisen i kategorien liten.

Dagleg leiar og eigar av Spar Hatlestrand Svein Boland var klar på kven som skal ha æra då han fekk spørsmål om kvifor han trur at akkurat dei fekk heideren.

– Me gjer ikkje feil. Ikkje eg, altså. Æra må gå til dei som jobbar med det, mellom anna Solveig Kirkhus og Anne Karine Fenne, poengterte han avslutningsvis.