– Tydeleg at saka er i grenseland for kva Høgsterett aksepterer
Delegasjonen frå Kvinnherad Energi ventar no i spenning på Høgsterett si avgjerd i striden med Haugaland Kraft.
Publisert
Sist oppdatert
Etter at Haugaland Kraft kjøpt Fjelberg Kraftlag har det vore usemje om sistnemnde sine aksjar i Kvinnherad Breiband. Kvinnherad Energi hevdar at dei utifrå aksjonæravtalen og aksjelova har forkjøpsrett, medan Haugaland Kraft/Haugaland Fiberinvest AS meiner dei har rett til å behalda aksjane.
Saka har vore fleire rundar i rettsapparatet. Kvinnherad Energi tapte både i tingretten og lagmannsretten. I haust sa dagleg leiar Øyvind Lernes til formannskapet at saka så langt hadde kosta dei 7 millionar kroner. Men selskapet anka vidare til Høgsterett, og kunne gle seg over at anken kom gjennom det tronge nålauga og ville bli teken opp til handsaming der.
Annonse
Betyr noko
Tysdag og onsdag var tida inne. Frå Kvinnherad reiste nemnde Lernes saman med ordførar Hilde Enstad, styreleiar Gunnar Våge og styremedlem Marit Bakke.
– Dette er jo ei utruleg viktig sak for Kvinnherad kommune, og ei veldig prinsipiell og interessant sak, sa Enstad dagen før.
Øyvind Lernes og Gunnar Våge fortel til Grenda at trass saka sitt alvor var ei stor oppleving å sjå Høgsterett og deira ærverdige lokale på nært hald. Delegasjonen hadde inga formell rolle under handsaminga, og det var advokatane Fredrik Dahm og Olav Fredrik Perland som la saka fram for dei fem dommarane.
Annonse
– Det er berre advokatar som får lov til å snakka der, men det er viktig å vera til stades, for då ser dei at det betyr noko for oss, seier Lernes. Haugaland Kraft stilte berre med finansdirektøren, i tillegg til advokat Stig Berge.
Heilt i ytterkant
Lernes og Våge tykkjer det er vanskeleg å ha ei klar magekjensle etter Oslo-turen.
– Advokatane våre har i alle fall gjort ein veldig god jobb og fått fram alle poenga. Ikkje minst er det tydeleg at saka er i grenseland for kva Høgsterett aksepterer. Det kom tydeleg fram i spørsmåla dei stilte. Og om saka eventuelt ikkje er utanfor kva Høgsterett aksepterer, så er ho i alle fall heilt i ytterkant, seier Lernes.
– Er det handsaminga i lagmannsretten som er i grenseland?
– Det er i alle fall noko Høgsterett ikkje er samd med lagmannsretten i, elles hadde dei ikkje teke opp saka. Men om det er nok, gjenstår å sjå, utdjupar Lernes.
Annonse
– Dommarane var mykje meir på hogget når det gjaldt å stilla spørsmål, supplerer Våge.
Signala frå hovudstaden er at det vil ta to til fire veker før retten har konkludert.
