TV-aksjonen: Sekssifra gåvesjekk frå Hydro Husnes

Det er produksjonsanlegga til Hydro i Norge som til saman gir over ein million kroner til årets TV-aksjon, som har fått namnet «Saman redder vi liv!».

Pengane går til Leger Uten Grenser sitt arbeid for å gi livreddande helsehjelp og medisinar til menneske som treng det mest.

«Saman redder vi liv!» skal bidra til å førebyggje epidemiar og behandle menneske som blir ramma av kjende og ukjende sjukdomar i fire land: Bangladesh, Den sentralafrikanske republikk, Den demokratiske republikken Kongo og Sierra Leone.

– Halvparten av verdas befolkning har ikkje tilgang til helsehjelp. Leger Uten Grenser gjer ein uvurderleg innsats for menneske som treng det mest. Eg er djupt imponert av arbeidet dei tilsette i organisasjonen og frivillige legg ned, både i form av humanitær bistand og den innsatsen som blir gjort for å synleggjere kriser og skape merksemd kring humanitære spørsmål, seier konsernsjef Hilde Merete Aasheim i Hydro i ei pressemelding.

Godt bidrag til verdas største dugnad

Til årets TV-aksjon gir alle aluminiumsfabrikkane og kraftverk i Norge ein sum, og totalen er heile 1.150.000 kroner.

– Hydro har gjennom mange år hatt stort engasjement og vore ein god partnar og bidragsytar til TV-aksjonen. Over éin million kroner frå Hydro er eit fantastisk bidrag til årets aksjon som verkeleg monnar. Arbeidet som blir gjort er viktig for at vi skal lykkast med verdas største dugnad, seier Vibecke Østby, leiar for TV-aksjonen.

I pressemeldinga kjem det fram at bidraga frå Hydro-verka går til å behandle pasientar, utvikle medisinar og gi livreddande helsehjelp til menneske i nokon av verdas gløymde kriser.

– Den norske dugnadsånda og TV-aksjonen har i tiår vist at vi saman kan gjere ein forskjell. Eg håpar alle våre tilsette og samarbeidspartnarar vil delta i denne nasjonale dugnaden, sluttar Hilde Merete Aasheim.