TV 2 sender direkte frå Rosendal
Når Folgefonnsenteret opnar tysdag 2. mai, stiller både TV 2 og NRK sterkt opp. Fyrstnemnde skal ha fleire direktesendte innslag frå bygda, deriblant vêrmelding.
TV2 vil mellom anna senda deler av «God Morgon, Norge» frå Rosendal, med lokale innslag og direktesendt vêrmelding frå Skålakaien, truleg med Eli Kari Gjengedal. Den fyrste sendinga frå bygda går på lufta alt kl. 06.55.
– Dette er sjølvsagt kjempeartig for oss, og viser at Folgefonnsenteret alt har skapt nasjonal merksemd. Den breie TV-dekninga gir senteret framifrå god PR, seier styreleiar Knut Førland i ei pressemelding.
Artikkelen held fram under annonsen.
Han legg til at både NRK og TV 2 vil delta på pressefrukosten som Stiftinga Folgefonnsenteret har invitert til tysdag morgon på Rosendal Turisthotell.
Hydrogenbil
Som ein del av Folgefonnsenteret sin fokus på framtidas energiløysingar, kjem også Vestlandet sin einaste hydrogenbil til Rosendal 2. mai. Det er det Bergensbaserte energiselskapet Greenstat som eig bilen.
– Greenstat arbeidar med nullutleppsløysingar, og har ansvaret for éin av stasjonane i Folgefonnsenteret saman med SKL og Universitetet i Bergen, seier Førland.
Stiftinga Folgefonnsenteret vonar at mange tar turen til Rosendal opningsdagen, og vêrmeldingane er dei aller beste.