Turneringa i First Lego League nærmar seg – Dørene er opne for alle!

Det er test-dag for elevane ved Rosendal Ungdomsskule, der dei øver seg og legg strategien for konkurransen First Lego League Tournament som går av stabelen laurdag 9. november i Kvinnherad Arena.

– Laurdag er dørene opne for alle som vil koma og sjå på! Konkurransen er spanande, elevar ved Husnes Ungdomsskule skal ha aktivitetar for ungar, og så kjem det folk frå VilVite i Bergen og skal ha show. Me håpar det kjem mange folk, seier Helena Espevik som arbeider på Newton-rommet.

Må vera strategiske

Det er seks påmeldte lag frå ulike skular i Kvinnherad: Rosendal Ungdomsskule, Bringedalsbygda skule, Skarveland skule, Halsnøy skule, samt to lag frå Undarheim skule.

Alle har fått tilbod om å bestilla besøk på Newton-rommet for å øva og justera programmeringa si. I tillegg har Helena Espevik og Matthias Zimmermann frå Newton-rommet reist rundt til dei ulike skulane og bidrege med tips og råd til elevane sitt arbeid.

Temaet for årets prosjekt er «Havet», og robotane beveger seg rundt på eit bord dekorert som ein sjø. Her kan robotane samla opp sjødyr eller bos, eller flytta på ulike gjenstandar. Helena Espevik forklarar kva konkurransen går ut på:

– Elevane skal få robotane sine til å utføra ulike oppdrag på ein bane. Dei har to og eit halvt minutt på seg. Oppdraga gjev ulike poeng, og det er opp til laget å velja ut kva oppdrag roboten skal løysa. Her må dei vera litt strategiske, og tenka både på vanskegrad og tidspress.

Lego League handlar altså ikkje om å leika med Lego, sjølv om det er ein god bonus ved prosjektet. Her lærer elevane å programmera, noko som står i læreplanen at dei skal bli introdusert for. Lego-robotane er ikkje fjernstyrte, og rørslene deira kan ikkje justerast i løpet av oppdraga, alt er førehandsprogrammert.

Vert sjølvstendige når dei får vera kreative

– Først bygde me stasjonane på banen, og så bygde alle ein robot. Dei beste robotane vart valt ut til å bli med i konkurransen. Og så har me lært å programmera dei, fortel Anna Oline Boland Romslo.

Lærar Marte Hellingsrud er veldig glad for at elevane hennar er med på First Lego League.

– Dette er gratis hjelp for oss med å gje elevane ei flott innføring i programmering. Eg har nett hatt utviklingssamtalar med elevane, og dei seier at matte og naturfag er veldig kjekt fordi me held på med Lego League. Me ser at elevane vert sjølvstendige når dei får lov til å vera kreative, som her. Då finn dei ut mykje på eige hand.

På konkurransedagen er det ein jury som skal dømma. Laga skal presentera robotane dei har bygt for dommarane, og forklara val dei har teke i prosessen.

– Kanskje dei har valt ein arm som går opp og ned, eller ein arm som kan bevega seg sidelengs, for eksempel. Dei må forklara grunnane til robot-designet i samband med kva oppdrag dei har valt at roboten skal løysa, forklarar Matthias Zimmermann som jobbar i Newton-rommet.

Djup konsentrasjon

I tillegg til robot-konkurransen, er det også ein innovasjons-konkurranse der deltakarane skal velja seg ei problemstilling knytt til havet, og koma med løysing på denne. Elevane kan velja mellom innovasjonsprosjektet og robot-prosjektet, og nokon blir også ansvarlege for å utvikla ein stand der arbeidet vert presentert. Alt dette er med på å sanka poeng til klassen.

Rundt bordet vert det prøva og feila, og elevane vekslar mellom djup konsentrasjon og frustrerte latter-utbrot. Det er ikkje lett å få programmeringa til å stemma perfekt overeins med vinklar og avstandar på banen. Men ungdomane er både ivrige og tolmodige, og det er tydeleg at arbeidet er gjevande. Praten går:

– Åh, den velta!

– Roboten er baktung!

– Me må ha litt meir vekt framme, eg hentar noko.

– Er det lurt at avisa tek bilete av dette då? No får jo dei andre laga sjå alle hemmelegheitene våre!

«MÅ bli Trondheimstur»

Ingvild Tvilde står og justerer programmeringa til ein av robotane. Ho forklarar at prosessen ikkje berre har vore lett.

– Inne på programmet Lego Spike prøver me å få roboten til å gjera det me vil. I starten prøvde me å laga heile ruta på ein gong, men så måtte me ha litt hjelp frå Matthias, og han råda oss til å programmera eitt steg om gongen. No går det litt betre, smiler ho.

– Det MÅ bli Trondheimstur på oss, Sigurd!, utbryt Kaleb Nshimiye til medeleven sin.

Vinnarane av turneringa i Kvinnherad Arena får faktisk bli med i den skandinaviske finalen som skal finna stad i Trondheim seinare i november. Så då står det att å sjå kven av deltakarskulane som får den billetten.