Turismeplan på høyring

I slutten av november vedtok Plan-, teknikk- og miljøutvalet at framlegget til reguleringsplan for Bondhus-Sunndal turist- og friluftsområde kunne sendast ut på høyring. Planforslaget er utarbeida av 3RW arkitekter AS på vegner av Kvinnherad kommune.

«Planarbeidet har som føremål å leggja til rette for stadutvikling, verdiskaping, trafikksikring, naturbasert turisme og friluftsliv i samsvar med viktige natur- og kulturverdiar», opplyser kommunen.

Fortau

Planområdet utgjer ein innfallsport til Bondhusvatnet som besøksmål, og grensar til verneområda Bondhusdalen landskapsvernområde og Folgefonna nasjonalpark.

«Med aukande turisme som genererer trafikkale utfordringar, er trafikksikring eit føremål. Planforslaget sikrar mjuke trafikkantar ved å leggja til rette for fortau, turvegar og møteplassar på dei mjuke trafikkantane sine premiss. Det skal også sikra trafikksikker tilkomst til friluftsområda. Samstundes er eksisisterande avkøyrslar utvida, og avkøyrslar frå fylkesvegen er redusert for å forbetra trafikktryggleiken i området. Busshaldeplassar for kollektivtransport er plassert nærmare sentrumsområda, og er utforma som kantstopp», står det på kommunen si heimeside.

Eit anna hovudføremål er å styra arealbruken til parkering.

«Parkering for besøkande til Bondhusvatnet og på- og avstiging for besøkande som kjem med turistbussar er lokalisert øvst i Bondhusdalen. Planforslaget opnar også for å etablera innfallsport for nasjonalparken på parkeringsområdet, og samstundes leggja til rette for servicebygning med toalett. Planforslaget sikrar også parkering for besøkande og næringsdrivande i Sunndal sentrum. Parkeringsløysingane har negativ påverknad på registrert dyrka mark», heiter det.

Isvegen

I sentrum er det teikna inn samanhengande torg, gatetun, kaianlegg og «blågrøn struktur» for å bidra til sosiale møteplassar. Ein legg også opp til moglegheita til å byggja gangbru ved utløpet av Bondhuselva.

«Isvegen har som føremål å vera turveg frå sentrum til Bondhusdalen på vestsida av dalen, og planforslaget sikrar at denne kan opprustast i samsvar med kulturminneverdiane i kulturlandskapet. Generelt innehar planområdet store verdiar knytt til landbruk, landskap, friluftsliv, kulturminne og naturmangfald», står det vidare.

Den 14. januar inviterer kommunen til informasjonsmøte i Olaløo. Der skal dei orientera nærare om planforslaget, og det vert høve til å stilla spørsmål.

Fristen for å senda inn merknad til planen er 7. februar.