Trygve Skaug til Rosendal
På fredag kjem Trygve Skaug for å fylle Riddersalen med sin musikk. Konserten er ein del av Baroniet sitt kulturprogram for sommaren.
Publisert
Dei siste åra har 36 åringen frå Ørje markert seg som både låtskrivar, vokalist og poet. Sidan 2010 har musikken hans vore å høyra på NRK P1 sine lister, og mange har truleg fått større kjennskap til artisten gjennom hans nylege deltaking i tv-programmet «Hver gang vi møtes».
Sjølv gler artisten seg enormt til konserten i Baroniet.
Annonse
– Publikum kan venta seg besøk av ein som gler seg enormt til å spela for dei. Stygt redd eg kjem til å halda på lenge, så sett gjerne av kvelden, informerer han.
Artisten har gitt ut fire soloalbum sidan 2014, det siste «Sanger du skal få når du våkner» kom ut på plateselskapet Grammofon i fjor. Lista over utgjevne singlar er også lang. I januar kjem det etter planen ut ny plate, og publikum kan venta seg nokre nye låtar frå denne. Den komande plata har fått tittelen «Sanger du skal få når vi lander».
Samstundes har Skaug samarbeidd med ei rekkje andre artistar, kor mellom anna Solveig Leithaug, Eva Weel Skram og Maria Mena inngår på lista. Sistnemnde har rosa både Baroniet, vertskapet og publikum, noko som har ført til at forventningane «står i taket».
– Det har vore så godt å vera i same rom som publikum dei siste vekene, og Baroniet no på fredag blir ein skikkeleg høgdare. Blir så fint! avsluttar artisten.
Annonse
Skaug, som kallar seg sjølv «offisiell skjeggmann», er dessutan ein av dei mestseljande lyrikarane i Noreg, kan ein lese på nettstaden hans. Sidan 2013 han han gitt ut sju diktsamlingar. Med sine 193.000 følgjarar på Instagram, er dikta hans blitt blant dei mest delte på sosiale medium. Dette gjer Skaug til ein representant for det populære fenomenet Instagram-poesi.
