Trur departementet kan snu i dyrkingsspørsmålet i Hattebergsdalen

Då Nasjonalparkstyret for Folgefonna hadde møte onsdag, vart på ny søknad om dyrking i Hattebergsdalen sett på sakskartet. Målfrid Matre Hatteberg og sambuaren Endre Mehl har tidlegare fått nei frå departementet på søknaden om å dyrka opp eit område i Hattebergdalen.

Inviterer klima- og miljøministeren til Hattebergsdalen

– Ein har tatt initiativ til å få klimaminister Espen Barth Eide til Hattebergdalen. Han har gitt avslag på synfaring, men formidlar at viss det er nye opplysingar i saka, så kan ein ta søknaden opp att. Det meiner me det no er kome, opplyser leiar i nasjonalparkstyret Sigrid B. Handegard.

Nye opplysingar

– Det er komen ein ny søknad, med uttale frå kommunen. Der viser dei til rapport frå professor Lars Olav Eik, som seier noko om korleis sauehaldet har endra seg med åra. Ein av konklusjonane er at viss ein ikkje har beiting, vil det ein skal verna endra seg, påpeikar Handegard.

Det er også lagt fram dokumentasjon for nasjonalparkstyret som viser at det i 1963 var gitt løyve til å fulldyrka dette området som Hatteberg og Mehl ynskjer å dyrka.

– Ein må rekna med at dette er rett, og er då snakk om seks mål. Om dette er dyrka då, så er det fulldyrka, forklarer Handegard vidare.

Bakgrunnen for saka er at Endre Mehl og Målfrid Hatteberg ynskjer å overta ein familiegard i Hattebergsdalen, men tilgang på grovfôr og areal gjer det vanskeleg. Dei søkte difor om nydyrking, og fekk dette godkjent av Folgefonna Nasjonalparkstyre, som konkluderte med at tiltaket ikkje ville endra landskapet sin karakter vesentleg.

Statsforvaltaren i Vestland klaga inn vedtaket til Miljødirektoratet, som så gjorde om Nasjonalparkstyret sitt vedtak.

Handegard seier Nasjonalparkstyret er tydelege på at ein vil ta dyrkingssøknaden opp att.

– Viss det er nye opplysingar som fører til at ein kan sjå på dette på nytt, og det gjer me no. Det må vera eit paradoks i den tida me er no, der me plutseleg er så sårbare som me er, seier ho vidare, med klar referanse til situasjonen i Ukraina.

– Optimist

Handegard minner også om at Hurdalsplattforma seier at ein skal leggja større vekt på kva dei lokale verneområdestyra seier, og seier ho har tillit til at regjeringa held seg til det. Ein annan faktor styreleiaren for nasjonalparken meiner er verd å leggja vekt på, er at sambuarparet skal gjennomføra dyrkeperioden på eitt år. Dermed blir perioden med aktivitet i området kort.

Bed om synfaring etter dyrkingsnekt

– Eg meiner at det bør liggja til rette for at departementet ser på dette på nytt. Styret i nasjonalparken er positive denne gongen også. 13. september skal det blir synfaring med statsforvaltaren i det aktuelle området. Me har fått som melding i styret at det er grunnlag for ny behandling, får saka til behandling i vårt møte 30. august, seier ho, og legg til:

– Eg vel å vera optimist og håper at dette kan ordna seg, sluttar Sigrid B. Handegard.