Truleg ny høyring om Børneset

Ordførar Hans Inge Myrvold slår fast at arbeidet med reguleringsplanen for Børneset går godt, men varslar at det truleg vert naudsynt med ein ny høyringsrunde.

I mars ville ikkje kommunestyret godkjenna den framlagde reguleringsplanen for næringsområdet Børneset i Uskedalen. I staden vart planen sendt attende til administrasjonen, samstundes som ein bestemte at ei politisk arbeidsgruppe skulle delta i den vidare prosessen. Den gruppa består av ordførar Hans Inge Myrvold (Sp), Leif Ove Mikkelsen (Ap), Signe Torill Skogseth (H) og Ove Lemicka (Frp).

I kommunestyret torsdag kveld orienterte Myrvold om framdrifta.

– Arbeidsgruppa jobbar særs godt og har hatt god progresjon i arbeidet. Vi har hatt gode møte og drøftingar med referansegruppa og planavdelinga. Ordføraren har no overlevert eit notat om det vidare arbeidet til kommunedirektøren og planavdelinga. Alt lovar godt for det vidare løpet, sa han.

Myrvold la til at det er føreslege endringar og tilpassingar i planen som gjer at det truleg krevst ny høyringsrunde.