Tronar øvst på liste: – Det eg hadde prøvd på blei verkeleg sett

For knappe to veker sidan skreiv Grenda om Anders Totland og hans nyaste bok som då var i ferd med å koma ut. No tronar altså den ferske barneboka heilt øvst på lista over Norli sine mest selde barnebøker for augeblinken.

– Eg er både rørt, glad og utruleg takksam for at det er så mange som kjøper og les bøkene eg skriv, og ikkje minst at dei blir sett pris på, sa Totland om den gledelege hendinga.

Desto større

Den Kvinnherad-baserte forfattaren opne ein heilt standard reklame-e-post frå Norli, då han tilfeldigvis fekk sjå si eiga bok omtala.

– Eg kika nedover og så plutseleg stod mi bok som vekas mest selde barnebok. Det var ein veldig fin morgon. Det er ei bok som både har kosta meg mykje, men også gitt meg mykje, å jobba med. Derimot så blir oppturen desto større når ein får att for strevet, understreka han.

– På toppen av det heile har eg også fått ein fantastisk kritikk av barnebokkritikk.no. Eg sat på ferja då eg las den og var utruleg glad for at ingen eg kjente sat i nærleiken, for der sat eg og grein av glede. Men så glad blei eg då, for det eg hadde prøvd på blei verkeleg sett, fortsette han.

Vidare fortel han at han har fått fleire flott tilbakemeldingar, både frå kjende og ukjende, bibliotekarar og bokhandlarar. Den aller finaste derimot innrømte han at kom frå dagleg leiar for Norli Husnes Heidi Sande Gertz.

– Heidi la noko ut på Facebook, der ho blant anna skreiv at den beste barneboka i Norge kjem frå Kvinnherad. Ho hadde både ledd, grine og blitt glad i alle dei ulike karakterane, og det er jo akkurat det eg håpar at skal skje, sa den glade og nøgde forfattaren.

– Eg må sei at det vart nokre turar til Svartatjødno i går for å få ut alle loppene. Det er min måte å få ut uro på etter at ting anten går veldig bra eller veldig dårleg, spesielt dersom det er jobbrelatert. Då treng eg å få kverna på det litt åleine, la han lattermildt til.

Gåvepakke

Som om ikkje det var nok er også Morten Svartveit, mannen som har lest inn ei anna populær bok av Totland, blitt nominert til Storytel awards for beste innlesing i kategorien «Romanar», med nettopp Totland si bok «Til Jord skal du bli».

– Eg må innrømme at eg aldri hadde høyrt om prisen før, men eg tykkjer det er veldig kjekt at folk blir sett og løfta fram. Eg har lese nokre av tilbakemeldingane han og boka mi har fått innpå Storytel, og det er fleire som likar boka betre berre fordi han les den. Eller andre som likte den sånn passe, men likevel betre på grunn av han, forklarte Totland.

– Slikt er jo ei gåvepakke til meg som forfattar, og eg vart kjempeglad då han takka ja til å lesa inn boka mi. Eg håpar alle går inn og stemmer på Morten, oppmoda han heilt til slutt.

Anders Totland ute med ny bok: – Fint å vera tilbake der eg byrja