Trio-tap på heimebane

Med tre mann ute etter det brutale lokaloppgjeret 26. april, gjekk det ikkje heilt slik Eivind Tufta Saghaug spådde og håpa før kampstart, laurdag 7. mai.

Før kampen starta hinka Saghaug over bana på krykker, etter å ha brote leggbeinet. På tysdag går gipsen av, og då får han kanskje svar på kva tid han kan håpa å vera attende på banen.

– Eg håpar jo eg får med meg dei siste kampane av sesongen kanskje. Elles er eg attende neste år. Eg kan ikkje gje meg no, seier han.

Han har sete på tribunen før, men ikkje grunna skade.

– Det er veldig keisamt å ikkje vera med. Det er vår første heimekamp på gras, så eg kjenner jo på kroppen at det er ute på banen eg vil vera.

Gras og heimebane

– Vinn de denne kampen?

– Eg har trua, det er iallfall eit lag vi bør slå. Vårt lag er eitt av dei best trente i divisjonen, så eg blir overraska viss ikkje. Det er gras og heimebane, det er ein fordel for oss.

– Og om Trio taper?

– Vi manglar jo tre nøkkelspelarar i dag; meg, Isak og Espen (alle skada i kampen 26. april). Men vi er såpass gode heile gjengen, så dette trur eg vi klarer, sa Saghaug før han fann sin plass øvst på tribunen, der han kunne ha foten høgt.

Overtak i 1. omgang, enda i tap

Den viljesterke bladfyken unngjekk så vidt å sei «break a leg», og ynskja heller lukke til før kampen var i gong.

Det var i 2. omgang det skjedde og gjestene stod for hendingane:

52 minutt ut i kampen fekk Martin Skjelvik Larsen ei åtvaring. I det 70'ende minutt vart heimepublikummet vitne til eit sjølvmål av Bjarg 2 sin kaptein Simen Godøy, og eit motstandarmål (Christian Foldnes Samnøen). 12 minutt etter scora Bjarg 2 på ny, Casper Andreas Mengkrogen Madsen. Før kampslutt fekk også Elias Refsahl Iversen ei åtvaring (90 min).

Resultatet vart til slutt 1-2 (0-0).

Biletserie frå Trio - Bjarg 2

Her kan du sjå nokre bilete frå 1. omgang, ein omgang med fleire sjansar på begge banehalvdelar, og fint spel der Trio såg ut til å ha overtaket på Bjarg 2, både fysisk og strategisk.