Trio-siger i Norheimsund

Det vart kamp om poenga heile vegen til siste fløytestøyt då Trio gjesta Norheimsund fredag kveld. Trond Helgesen sendte gjestane i føringa tidleg i 1. omgang, men Trio måtte sjå vertane kjempa inn utlikninga rundt halvtimen.

Etter pause kvessa det set til. I løpet av to minutt pådrar trenar Aleksander Ekeland seg to gule kort og må forlata benken og området for lagleiing. Minuttet etterpå er Norheimsund frampå og tar leiinga 2-1.

Men Trio hadde ikkje tenkt å bruka ein heil fredagskveld i Kvam utan å få noko med seg heim. Martin Lygre utliknar med ti minutt att på dommaruret, og på overtid er Martin Hjelmeland Arnesen på rett plass og sikrar alle tre poenga.

– Veldig fortent. Heldigvis, for me kan ikkje gje vekk to kampar på rad, kommenterer trenar Aleksander Ekeland etter kampen.

Lærte av tapet

Han har førre helgs tap mot Bjarg 2 friskt i minne, der dei var det beste laget, men gav vekk leiinga, og brukte det Ekeland meiner er feil nøkkel for å prøva å låsa opp motstandarforsvaret.

– Viss me klarer å læra noko av eit tap, så er det verd det. Det me har jobba denne veka er å halda fram å spela vårt spel, sjølv om me ligg under. Me har ikkje typane til å handtera dei lange ballane, så me må løysa det på ein annan måte. Det klarte me i denne kampen, forklarer han.

Eventuelle opprykksambisjonar seier Ekeland er parkerte etter langtidsskadane på Eivind Saghaug og Mats Jørgensen.

– Me tar kamp for kamp. Me skal vera ivrige etter å utvikla spelestilen vår vidare. Eit av baklengsmåla våre er eit produkt av spelestilen vår. Me vågar å ha ballen, og då jobbar me med det, men blir straffa for feilpasningar, seier trenaren.

Utvist

– Me spelar fin fotball, og burde leia meir. Så stilnar det av, og så kjem det ein i mot på tilfeldigheiter. 2.omgang startar ok, men me gir vekk eit straffespark rundt timen. Frå 70 og ut køyrer me, og det er heilt fortent at Martin (Lygre) og Martin (H. Arnesen) sikrar oss poenga, meiner Ekeland.

– Eg sa ikkje noko i 60 minutt. Så reagerer eg på at det ikkje blir gitt frispark til oss, og får to gule kort av dommaren for det. Det er sjølvsagt unødvendig av meg, uansett, sluttar Ekeland.

Norheimsund - Trio 2-3 (1-1)

7. min. 0-1 Trond Monslaup Helgesen

30. min. 1-1

59. min. 2-1

80. min. 2-2 Martin Lygre

91. min. 2-3 Martin Hjelmeland Arnesen

Trio (4-2-3-1):

Karsten Huse Bjørnebøle

Sander Saghaug Lillesletten G

Sigurd Sollihagen Nilsen

Åsmund Eikeland Voster Kaptein

Vegard Prestnes Jørgensen GGG

Alkan Abdula

Nikolai Bendiksen Mayer

Trond Monslaup Helgesen

Marcus Hylland Såtendal GG

Martin Lygre

Emil Eikeland Voster

Innb: Martin Hjelmeland Arnesen, Ruben Saug