Trening for alle: – Det er veldig motiverande

To dagar i veka arrangerer Frisklivssentralen trimgrupper, både på Husnes og i Rosendal. Til vanleg må du vera meldt på, men akkurat denne dagen kan kven som helst bli med. Og akkurat det er det fleire som vil.

Litt av poenget

– Dette er eit av lågterskeltilboda som Frisklivssentralen tilbyr. Ein må melde seg på, men kven som helst kan bli med. Du treng ikkje vera verken sprek eller i dårleg form, men dersom du slit med å koma i gang med treninga på eige hand kan dette tilbodet vera for deg. Her er ope for absolutt alle, og alle er med på sine premissar, forklarer frisklivskoordinator Martha Teigen Varanes.

Treningane føregår alltid ute, uansett vêr.

– Når ein er i rørsle, så er det ikkje noko problem uansett. Og når ein bur her på Vestlandet, så kan ein ikkje la seg styra av vêret heller, poengterer Varanes lattermild.

Caroline Holmedal Saghaug, som også jobbar i Frisklivsentralen, legg til at det å vera ute er litt av heile poenget.

– Det er meininga at det skal vera ute, utan noko utstyr, for å syna at dette er noko alle kan gjera. Då blir det også enklare å fortsetja sjølv etterpå, eller heime. Det er jo det me vil, å hjelpa folk til å koma i gang med trening eller aktivitetar, understrekar ho.

Veldig motiverande

Gruppa som er med på treninga denne dagen blir tekne med på ulike øvingar, alt i frå enkel aerobic og lett jogg som oppvarming til ulike uthald- og styrkeøvingar. Nokre av deltakarane er med for fyrste gong, medan andre har vore med lenge.

– Ja, dette er mi fyrste gong, så eg veit ikkje heilt kva eg går til. Eg kjenner derimot både Martha og Caroline godt frå før, seier ein av deltakarane Mette Aasen.

To andre damer som har vore med lenge kunne derimot skryta over tilbodet som dei er veldig godt nøgde med.

– Treningane er heilt supre, konstaterer Mai Britt B. Bendiksen kort og godt.

– Det er veldig motiverande å ha den avtalen to gonger i veka. Då blir det faktisk gjennomført, i motsetning til om ein skal prøve å trena heime for seg sjølv. Her har me faste tider og klokkeslett, så varierer det litt kor me er. Nokre gonger er me her på idrettsbana, andre gonger nede ved vatnet eller andre stader, supplerer treningsveninna Lene Taranger.

Etter ein liten pause fortset treninga, og høgtempo treningsmusikk ljomar på ny ut av det vetle portable anlegget treningsinstruktørane har med seg. Det er god stemning i gruppa då dei på ny samlar seg på rundt Frisklivsdamene, klare til dyst.