Treng nye kunstelevar

Kunstgruppa i kulturskulen har plass til fleire nye søkjarar til hausten. Søknadsfristen for nye elevar er 15. april.

I kunsttimane lærer elevane ulike teknikkar og teiknetriks. Dei har eit pensum dei går gjennom, men av og til blir oppgåvene endra undervegs.

– Elevane kjem med idear og innspel. Det er det som er så spanande med kunst, seier kunstlærar Karin Bøe.

– Vi kan nesten gjera kva vi vil ut frå det temaet vi held på med, fortel Lena Larsen som er ein av tre elevar i Rosendal.

Nett no held dei på med gipsmasker. Planen er å måla dei kvite, og montera dei inn i ei øskje, slik at dei blir noko meir enn berre ei maske.

 

Avslappande aktivitet

Lena har gått på kunstgruppa i kulturskulen sidan ho var åtte.

– Eg synest det er veldig kjekt å halda på med forming. Det er avslappande og roleg, og eg synest det er veldig greitt, seier ho.

I løpet av åra i kunstskulen har Lena, Oda og Helene fått læra teikning, skuggelegging, bruk av ulike blyantar, perspektiv, og å teikna etter kropp, fjes og natur.

– Vi har fargeblyantar, tørrpastell og oljekritt. Kritteikningane brukar vi litt matolje på fingeren på, for å få krita til å smelta slik at det nesten blir som eit måleri. Det passar godt til såkalla Munch-bilete, fortel Karin.

 

Teikna med symaskin

Elevane har også fått prøva seg på akvarell og akrylmåling, og ikkje minst på symaskin.

– Dei har lært å teikna med symaskin, ved hjelp av stoppefot. Det blir fine, applikerte bilete, fortel læraren.

Ho har ei kunstgruppe i Rosendal og tre på Husnes, totalt 25 elevar. 16-åringane Lena Larsen, Oda Helene Skjævesland og Helene Bjørke er dei einaste elevane i Rosendalsgruppa, og når dei går ut til hausten er det plass til nye elevar.

– Vi treng søkjarar, og elevar frå 4. klasse og oppover kan søkja, fortel Bøe.