Treng nye kraftkontraktar

– For å byggja meir, treng me meir kraft. Me treng mykje kraft, som er fornybar og til ein pris som me kan driva aluminiumsproduksjon på, sa fabrikksjef Jon Ola Ystgaard under Kvinnheradkonferansen.

Hydro Husnes har kontraktar, men sjølv lange kontraktar tar slutt.

– 2030 går den første ut. Å forhandla i denne marknaden, er ikkje gunstig for oss no. Aluminiumsindustrien jobbar med lange horisontar. Me er opptatte av å halda fram å utvikla verka våre, sa han.

– Aluminium passar inn

Av dei tidlege føredragshaldarane var Tor Ove Horstad og Jon Ola Ystgaard på vegner av Hydro Husnes.

Fabrikksjef Ystgaard minna om at Hydro vart grunnlagt i 1905, og at Norge har hatt overskot på vasskraft sidan då. Han minna også på kor Hydro kjem frå, der kunstgjødselproduksjon for å stagga ein hungersnød var motivasjonen for å skapa industri.

– Men korleis ser framtida ut? spurde Ystgaard, og tok på seg å svara for Hydro sin del.

– Aluminium passar godt inn i endringa frå karbondriven økonomi til ein grønare industri. Det me lagar er relevant også i framtida, og det gir mogelegheiter for eit verk som Hydro Husnes. Me er godt rigga for framtida. Storleiken er viktig, og ein fordel, meinte Ystgaard.

Han peika på at bedrifta har utvida produkta sine, og ikkje berre produserer aluminium i bolt, men også nokre deler til bilindustrien.

– Me har 100 nye tilsette, folk me trur me får veldig god nytte av. Kombinert med Søral-kulturen og Hydro-historia, så får me ein veldig sterk gjeng, skrytte Ystgaard.

Dei norske verka har den mest miljøvenlege produksjonen, og det lågaste CO2-avtrykket i verda.

– Det er noko me ser at kundane våre blir meir opptatte av, og set større og større pris på. Det er eit flott utgangspunkt å byggja vidare på.

Kraftproduksjon

Tor Ove Horstad frå Hydro Rein tok blant anna opp hansken på kraftkontraktane etter Ystgaard.

– Det er spennande å sikra ein langsiktig avtale for Hydro Husnes. Hydro har halvparten av straumen på eigne kontraktar, ein firdel på vasskraft og fjerdedel på vindkraft. Me må ha kraft, og det på vilkår som kan vidareutvikla våre fem verk, sa Horstad.

For å konkurrera mot den internasjonale marknaden treng dei avtalar på under 40 øre/KWh.

– 30% av produksjonskostnaden er kopla mot kraftprisen, forklarte han.

Horstad peika på at det har vore stopp i fornybarsatsing i Norge, med unnatak på oppgradering av vasskraftanlegg. Han trekte fram vindkraftprosjektet Snøheia industrikraft i Høyanger og Sunnfjord som noko Hydro jobbar med.

– Det er viktig at ein får vist at ein får sikra arbeidsplassar og framtid. Dei som tar kostnaden av å få eit vindparkanlegg i sitt nabolag må sjå at det sikrar deira område. Det er eit vegval, for det er fordeler og ulemper her, slutta Horstad på vegner av Hydro.