Treng hjelp til å bli kvitt hamnespy
Den framande arten hamnespy har dei siste åra etablert seg langs kysten av Noreg. Les meir om kva ein kan gjere for å stoppe spreiinga her.
Publisert
Sist oppdatert
Statsforvaltaren i Vestland er uroa over spreiinga av den såkalla hamnespy (Didemnum vexillum) eller japansk sjøpung som den også heiter. No kjem dei med tips for kva kvar enkelt kan gjere for å hindra at den spreier seg vidare.
Hamnespy er ein framand art som spreiar seg raskt og skapar store problem for marine miljø og næringar. Den legg seg som eit teppe på havbotnen og fortrenger alle andre arter.
Annonse
Båteigarar bør vera særleg merksame, då arten veks på skrog, fortøyingar, brygger, teinar og anna som finst i sjøen. Det kan vera lurt å inspisera båt og utstyr og sørga for at hamnespy ikkje blir spreidd i samband med ferdsel eller reingjering.
Som småbåteigar er det særs viktig med tiltak for å redusera spreiing, då båtane ofte rører seg mykje og ofte er i grunnare område der hamnespy likar seg best.
Korleis kjenner ein igjen hamnespy?
Hamnespy er eit sekkdyr, men er meir ru enn andre sekkdyr som ofte er glatte. Den er beige-oransje og veks som ei matte utover stein, berg, tau, brygger og andre material. Det sikraste kjenneteiknet er at den har stjerneforma opningar synleg under vatn, årenett og store porar.
Annonse
Kva kan du gjere om du kjem over hamnespy?
Arten døyr i løpet av ei veke ved uttørking. Du kan setje båt og utstyr på land og la sola tørke det ut. Hamnespy døyr også om ein legg det i ferskvatn i minst seks timar. Les meir på Miljødirektoratet sine sider.
Mistanke om funn av hamnespy skal meldast inn og verifiserast av folk med marinbiologisk kompetanse. Dersom hamnespy blir stadfesta i ei hamn skal observasjonen rapporterast til Artsdatabanken og tiltak for reingjering og avfallshandtering setjast i verk for å unngå vidare spreiing.
