Trekte søknaden

Rektrutteringsbyrået Utviklingspartner har gjennomført tre intervju til rådmannstillinga i kommunen. Personen dei innstilte på har no trekt søknaden, og jakta på den nye rådmannen i Kvinnherad held fram.

– Nett no har ein ingen som er innstilt til stillinga. Utviklingspartner arbeider vidare med å rekruttera rådmann, fortel ordførar Synnøve Solbakken.

– Vert det opna for nye søkjarar?

– Det er det Utviklingspartner som avgjer. Dei kjem med alternative personar til oss, og så er det kommunestyret som har siste ordet. Eg har eitt mål for auga, nemleg å rekruttera den beste rådmannen for Kvinnherad, seier Solbakken.

Ordføraren fortel at det har blitt gjennomført tre intervju. Nummer to og tre var likestilte, men rekrutteringsbyrået innstilte berre på ein kandidat til jobben. Personen det vart innstilt på er ein av dei som er unnateke offentlegheit, og vi får difor ikkje vita kven som no takka nei til jobben.

Etter at Trond Sætereng har siste dag på jobb i morgon, vert Kjell Odd Nygård fungerande rådmann. Som kjent skal han også gå av i februar neste år, og det blir spanande å sjå om ein får ny rådmann på plass til den tid.