Trefte blink med jaktmesse
Kompisgjengen fylte Rosendal Samfunnshus med jaktinteresserte då dei skipa til den første jaktmessa i Kvinnherad på fleire tiår. Det har allereie gitt meirsmak til ny messe neste år.
Publisert
Sist oppdatert
– Det har gått over all forventning! Dette gir allereie meirsmak nok til at me vil å blåsa i gang til neste år også, og då utvidar me, kunne Morten Haukenes Solsvik slå fast alt før parteringskurset til Joar Søhoel tok til.
Då hadde Solsvikmed stor glede registrert at publikumstalet nærma seg 300, og at det måtte setjast ut ekstra stolar for å ha sete til alle.
Annonse
Øvste hylle
Samfunnshuset var ikkje berre fylt opp med jaktinteresserte og nyfikne kvinnheringar. Fleire utstillar nytta høvet til å visa sitt utval fram, blant dei var Jakt & Fritid som stilte med både klede og våpen. Der var varaldsøyningen Christian Haukenes på pletten til å hjelpa dei som lurte på å skaffa seg ny børse.
– Eg hjelper til for dei når dei er messer som denne, og så er eg med på å arrangera. Det er selt godt allereie, sjølv om det berre er ein time sidan dørene opna, sa Haukenes til Grenda medan Knut Enæs fekk prøva ein av Sauer-børsene frå øvste hylle.
Blant det som lokka tilskodarar var gevirvurderinga til Terje Wangsholm frå Norges Jeger- og Fiskeforening (NJFF) og taksedermist Helge Haukeland sine utstoppa dyr. Bendik Aarthun var ein av dei som tok ture.
Annonse
– Eg er her for å sjå, og kanskje læra litt. Førebels er det småviltjakt eg går på. Kjekt dette, meinte ungdommen.
Parteringskurs
Eit av dei definitive trekkplastera på messa var Joar Søhoel, kokken som kom på andreplass i Farmen i 2012.
– Skal skjera ned hjorten og fortelja om korleis jegerane kan ta best vare på kjøtet sitt. Eg har hatt rundt 20 slike live parteringskurs, og dette er den mest komplette messa eg har kome til, her har dei tenkt på alt. Eg syns dei har gjort ein kjempejobb, skrytte Søhol, som også skulle laga hjortegryte i pausen mellom parteringskurset og filmføredraget.
– Det blir ny rekord for meg i jaktfilmføredrag, dette er det mest folkerike eg har hatt det for, sa Søhoel nøgd før han gjekk på scenen, der ein hjorteskrott hang og venta på nedskjering.
Omkvedet hos dei mange som gjekk rundt og forvita seg denne laurdagen, var det same som det Tore Furdal formulerte:
Annonse
– Dette er eit kjekt tiltak, og det er på sin plass at me har ei slik messe i ein hjorte- og jaktkommune som Kvinnherad. Det er trass alt 1500 jegerar her, sa Furdal.
– 320 selde billettar i løpet av dagen, oppdaterte Trond Steinsvik etter at dagen var omme.
Messe i 2025 blir det etter alle solemerke.
– Då må me kanskje ha på plass betalingsterminal også, smilte Kristine Haukenes som sat og tok i mot inngangsbillettar etter kvart som publikum strøymde på.
