Tre vinnarar av skrivekonkurranse

Nokre valde å skriva om zombiar og vampyrar, medan andre var innom tema som misunning, frykt og misforståingar.

– Vi har prøvd å utnytta det som elevane synest er spennande med «halloween» og skapa eit fagleg innhald ut frå det. Vi har jobba ein del med skriverammer og andre slike ting, men har knytt det opp mot det som er gøy, og då blir jo læringa mykje kjekkare, fortalde avdelingsleiar ved Undarheim skule Eirik Werner Eikeland.

Alle 197 elevar ved Undarheim har skrevet ei historie, og nokon har vore snille, andre lange eller korte, med eit antiklimaks eller med ein skikkeleg tvist på slutten.

– Dei har heldt på ei god stund. Vi pynta til Halloween i haustferien, og vi lagde «skaparverkstaden» om til ei skrivestove som inspirasjon. På eit tidspunkt hadde vi heile tavla her inne dekka i skumle ord, fortalde Eikeland, og la til;

– Det har vore veldig kjekt å koma inn her og sjå elevane sitta og sjå opp på tavla og leita etter ord dei kan fletta inn i historiene sine.

Forfattarhjelp

Forfattar Anders Totland hadde ein snarvisitt innom dei eldste klassane for nokre veker sidan for å sjekka om nokon hadde spørsmål og for å fortelja litt om skriving. Han prøvde å tona ned konkurranseelementet.

– Eg vart presentert som ein slags dommar, men eg meiner at det at ein skal skriva ein så god historie som ein kan og at det skal kårast ein vinnar, betyr ikkje at ein treng å sjå på det som ein konkurranse, sa han og la til;

– I ein konkurranse endar ein opp med ein heil haug taparar, og det gjer vi jo ikkje her.

Totland vart imponert over skrivegleda ved Undarheim, og fann nokre detaljer i historiene han synes var fascinerande.

– Nokon klarar å fanga opp sjangargrep og ting som er veldig gøy, til dømes Mali i 7.klasse som har skrevet dette;

«Og så kom han i fengsel i 15 år for drap på Sara. Og så såg dei han aldri igjen…Eller gjorde dei det?».

Skriv om det du kjenner, seies det, og vi får håpa at Mali og dei andre ikkje har gjort dette. Kanskje bortsett frå dei som skreiv ein relativt koseleg historie om to gutar som gjekk på Handelshøgskulen i Bergen.

Klare vinnarar

Av dei 197 historiene hadde Eikeland vald ut rett over 20 historier som han, Anders Totland og utsendte frå Grenda og Kvinnheringen skulle vela ut vinnaren frå. Etter ein liten diskusjon vart det samrøystes vedteke at ein vinnar ikkje var nok, og tre vinnarar vart trekt ut.

Frå andre klasse vart Johanna Sundsteigen Hansen valt ut. Ho hadde laga ei fin bok om ei jenta og ein zombie som budde i same hus. Men då zombien kom seg laus gjekk det ikkje så bra lenger.

– Eg laga den på eit bokprogram og så skreiv læraren min den ut, fortel Johanna, som ikkje heilt veit kva inspirasjonen bak historia var.

– Eg fann den berre på, sa ho.

Milo Minh Nguyen Systad som er 9 år og går i fjerde klasse hadde skrive ein kort, men skremmande tekst.

– Eg berre fann det på. Eg har laga den i Word i teams, og så fann eg ein teikning på internett som eg sat inn. Det er figuren «Rush» frå Doors som er eit skummelt spel på nettsida Roblox, kunne han fortelja.

Tredje og siste vinnar var Selma Ameti i 6.klasse. Ho hadde skrive ei historie full i intriger, misunning og med ein tvist som kunne få kven som helst til å gispa i overrasking.

– Eg brukte sånn passe lang tid. Det var ikkje så vanskeleg, fordi eg likar å skrive og eg likar skumle filmar, fortalde Selma, som skriv mykje på fritida også.

Grenda trykker vinnarhistoriene i torsdagsavisa.