Tre brannfarlege tunnelar i Kvinnherad
Ifølgje NRK har over 200 norske tunnelar usikra matter med det brannfarlege stoffet PE-skum i taket. Tre av desse ligg i Kvinnherad.
Publisert
– Vi brukar å seia at PE-skum er som bensin i fast form, fortel Are Brandt til NRK. Han har tidlegare jobba ved Norges Branntekniske Laboratorium, og vert rekna som ein av landets fremste ekspertar på tunnelbrannar.
Om PE-skum heiter det at stoffet er tungt antenneleg, men om det fyrst tek fyr, så blir det ein eksplosiv brann med svært giftige gassar. I romjula oppstod ein tunnelbrann i Sør-Korea. Seks personar mista livet og 29 vart skadde. Det er ikkje stadfesta om PE-skum medverka til infernoet, men brannfarleg materiale i tunneltaket var i alle fall ei årsak til at brannen vart så kraftig.
Annonse
Så fort som råd
Seniorforskar Gunnar Jenssen i SINTEF karakteriserer brannen i Sør-Korea som ein «tankevekkar». Han meiner det er uakseptabelt at det framleis er mange tunnelar med udekt PE-skum her til lands.
– Enten må vi dekka til PE-skummet så fort som råd, eller så må vi laga fleire rømmingsvegar ut av tunnelane, seier han til NRK.
Bakgrunnen for at tunnelane har PE-skum i taka, er at desse mattene er eigna for vass- og frostsikring. I Norge vart slike matter tekne i bruk for 40 år sidan, men då ein vart kjent med brannfaren, vart det i 1997 stilte krav om at skummet skulle dekkast til med 8 centimeter med sprøytebetong. Kravet omfatta likevel berre nye tunnelar.
Annonse
NRK har funne ut at det framleis finst over 200 usikra tunnelar i Norge. 90 av dei ligg på riks- og europavegnettet, av desse 54 i Vestland fylke. På fylkesvegnettet finst det 112 usikra tunnelar, og her høyrer 29 heime i Vestland. Den lengste av dei usikra er Vallaviktunnelen, som strekkjer seg 7,5 kilometer mellom Granvin og Ulvik.
Kan venta
NRK har henta inn ein kommentar om tryggleiken frå tunnelkoordinator Corinne Chiodini i Statens vegvesen
– Dekking av PE-skum har vore, og er, prioritert etter mengde usikra PE-skum og brannrisiko. Risikokriteria er hovudsakleg lengde, stigningsgrad, trafikkmengd og mengde samanhengande PE-skum, seier ho til statskanalen.
Dei mest risikoutsette tunnelane har tidlegare blitt brannsikra. Når det gjeld resten meiner Vegvesenet at dei kan venta.
I Kvinnherad har følgjande tunnelar matter med udekka PE-skum:
Annonse
Furebergtunnelen. Opna 1971, 745 meter.
Nordrepolltunnelen. Opna 1972, utvida 2012, 647 meter.
Stussvikhovdatunnelen. Opna 1986, 1217 meter.
