Trappar ned det aktive søket – avhengig av meir informasjon

– Vi trappar ned det aktive søket, stadfestar politioverbetjent Torgeir Fosse til Grenda tysdag kveld.

Det var søndag Vest politidistrikt sendte ut saknamelding etter Kjell Edvin Ølmheim (48). Han er frå Bergen, men vart sist sett fredag morgon i bustaden til eit familiemedlem på Halsnøy. Søndag fann ein forbipasserande ein telefon på vegen langs Erslandsvatnet ved Utåker, og den viste seg å tilhøyra Ølmheim.

Tysdag vart det starta aktivt søk i området.

– I søket har vi brukt både Kvinnherad Røde Kors hjelpekorps, brannpersonell og redningsskøyte. I tillegg har frivillige og familien vore ute og leita. I hovudsak har det dreia seg om bilsøk og båtsøk på heile strekninga Utåker/Holmedal og langs land til Valen. Vi har òg søkt ved Halsnøy, gjennom Høylandssundet til Ranavik med båt, fortel Fosse.

Redningsskøyta som var i aksjon var RS 120 «Sundt».

Bilen

Sjølv om den aktive leiteaksjonen er trappa ned, vert det jobba vidare på andre frontar.

– Vi jobbar heile tida med å samla elektroniske spor, utan at det hittil har gitt oss konkrete opplysningar om kor mannen og bilen er. Dette er årsaka til at vi avsluttar det aktive søket no. Vi treng ny informasjon som kan gje oss eit naturleg utgangspunkt for vidare leiting. Viss vi ikkje finn mannen, så er nok bilen det enklaste å finna, vurderer Torgeir Fosse.

Fosse understrekar at politiet etterforskar vidare med fullt trykk.

– Men vi er avhengig av tips, til dømes om nokon har sett bilen, ein grå Honda CR-V 2006 med registreringsnummer SU27433. Skulle nokon vera usikre, så er det betre at dei ringer éin gong for mykje enn éin gong for lite, seier Fosse.

Folk kan ringa 02800 om dei har opplysningar til politiet.