Traktorhistorier – tanken bak

I Kvinnherad har landbruket spelt ei stor rolle i samfunnsutviklinga, og bidrege til ein stor del av den totale sysselsettinga i kommunen. Kvinnherad er blant kommunane som i dag går mot straumen, og mange bønder satsar villig på ei framtid med lokalprodusert mat ved å innfri krava som blir stilt.

Landbruket har vore utvikla gjennom generasjonar, og er derfor ein viktig del av identiteten i lokalsamfunna og kommunen. Denne identiteten vert freista utforska gjennom artikkelserien Traktorhistorier, i eit år kor røystene i jordbruksoppgjeret stadig må hevast for at det skal vera mogleg å leva av å vera bonde.

Traktoren, kanskje eit av dei viktigaste verktøya bonden har, blir i denne serien eit gjennomgåande symbol for effektivisering, investering og utvikling innan næringa. Ved å lytta til bønder frå heile kommunen, vil det dessutan visa seg at føresetnadane for å driva landbruk ikkje er lik for alle; Kvinnherad er eit Norge i miniatyr.

Korleis påverkar dette, og krava som blir stilt, landbruket i kommunen?

Har du eit perspektiv, minne, eller erfaring du vil bidra med i denne serien, set me stor pris på tips.