Tråkka seg til 12. plass i eit enormt sterkt VM-felt

Vidar Mehl imponerte i konkurranse mot verdseliten då tidenes første VM i e-sport gjekk av stabelen onsdag ettermiddag.

– Eg er enormt nøgd. Halvproff som eg er, med full jobb på sida av trening, så synest eg det er utruleg kult at eg kan vera med å kjempa mot profesjonelle syklistar. Eg viser jo at dei ikkje er umenneskelege, seier Vidar Mehl.

Flagget på brystet

Vi snakkar med syklisten frå Omvikdalen dagen etter at han har sykla for Norge si ære i tidenes fyrste verdsmeisterskap i e-sport. Ei ære Mehl verkeleg kjente på i timane før han tråkka i gang heime i sveittebua han har snikra sjølv.

– Det var veldig kult å bli tatt ut til VM, eg har aldri sykla eit slikt meisterskap før og eg har heller aldri sykla med flagget på brystet. Akkurat det merka eg at betydde litt ekstra. Det er noko ekstra med det å sykla for landet si æra. Så eg har vore skikkeleg nervøs og på tuppa no i fleire dagar. Men det førte nok til eg var ekstra skjerpa. Du vil verkeleg gje alt når du har flagget på brystet, seier Vidar.

Konkurranseinstinkt

Han hadde lagt opp til ein strategi om å prøva å henga med i teten eit godt stykke, for så å gje alt han hadde mot slutten. Ein strategi som må seia å ha fungert når han kryssa mållinja til ein 12. plass i eit felt med fleire av verdas aller beste syklistar.

– Eg låg bra med i siste bakke, og var langt framme midtvegs i bakken. Så stoppa det litt mot slutten, men eg hadde krefter nok til å ikkje siga så mykje bakover. Men det vart litt for langt bak til å vera med heilt i toppen, seier han og legg til:

– Eg er utruleg nøgd med 12. plassen. Når du ser på kven som var med så synest eg at det er eit sterkt resultat. Eg var jo redd for om eg i det heile skulle klara å henga med når det var så mange gode med.

Den frykta har han nok bygd opp unødig. For sjølv om ikkje alt klaffar på trening, så skjer det noko med den seige konkurransemannen frå Omvikdalen når han får startnummer på brystet.

– Det gjer eit eller anna med meg. Det er noko som skrur seg på. Eg er enormt langt unna det nivået på trening, men i ritt så får eg det liksom ut. Det er vanskeleg å forstå, men og veldig kjekt å sjå, smiler han.

No tar Vidar, som saman med broren Kjetil er nominert til Årets namn i Kvinnherad i 2020, ein velfortent juleferie, før det brakar laus med nye e-sport-seriar like over nyttår.