Tråkka seg gjennom 14 timar lang sykkeltur til Langesund

Fem av Kvinnherad Sykkelklubb sine syklistar la torsdag i førre veke ut på sin årlege langtur. I år gjekk turen frå Utåker til Langesund.

I ei smittefri verd skulle Reidar Pedersen, Vegar Saghaug, Rune Haugland, Håvard Pedersen og Oddvar Eikenes alle ha fargelagt Jotunheimen Rundt med Kvinnherad Sykkelklubb sine signalgule fargar i helga som var. Men på grunn av koronapandemien vart rittet avlyst.

– Då kasta vi oss rundt og la ut på vår årlege langtur, seier Rune Haugland.

357 kilometer

Han og hans fire lagkameratar sykla om bord på siste ferje frå Utåker torsdag kveld, og starta så på den 357 kilometer lange sykkelturen mot Langesund.

– Vi sykla over Åkrafjorden, og fekk våre to fyrste og einaste punkteringar der, vidare sykla vi over Røldalsfjell og Haukelifjell. Så tok vi nokon nye vegar då vi kom austover, med litt småvegar rundt for å unngå å sykla for mykje på e134, seier Rune.

Og sjølv om vegen der var ein del dårlegare enn den hadde vore på e134, var trafikken desto betre.

– Det gjekk veldig greitt. Etter 14 timar og 16 minutt med effektiv sykling, så kom alle saman i mål i Langesund i 16-tida på fredag, seier Rune.

Der venta syklistane sine betre halvdelar som er med på dei årlege langturane.

– Damene er med i bil, så vi gjer det til ein tur. Planen i år var at vi skulle bu på eit spahotell, men så var det vi karane som bestilte det, og det viste seg å ikkje vera eit spahotell, men eit badehotell. Så neste år vil damene vera med i planlegginga, ler Rune.