Tråkka inn til 2. plass i Nibberittet

Nibberittet er eit tur- og trimritt som går på landeveg frå Geiranger sentrum og opp til Dalsnibba, 1500 meter over havet. Løypa er på 21 km, og vart i 2022 arrangert for 23. gongen.

«Kjekt å prøva noko nytt og samstundes frykteleg slitsamt på slutten når Håvard Gjeldnes passerte meg», skreiv Mehl på Instagram etter vel endt ritt.

Vêret var bra, men som ein ekstra styrkeprøve baud Geiranger også på motvind. Nokre dagar etterpå medgir Mehl at dei siste tre kilometrane var særleg seige.

– Når ein syklar oppover i meir enn ein time blir ein jo stiv til slutt, men det var artig å prøva, seier han.

Mehl hadde aldri før prøvd seg på eit motbakke-ritt som dette, og seier seg difor nøgd med andreplassen. Samstundes meiner han det var fint å vitja Geiranger.

– Eg har faktisk aldri vore der før, så eg og sambuaren fekk vore litt turistar òg. Det var veldig flott!

Det var totalt 264 deltakarar i årets ritt. Mehl sykla inn til tida 1.07.32, mindre enn minuttet bak Gjeldnes, som fekk slutttida 1.06.17. Tredjeplassen i herreklassen var det Sindre Skogsbakken som sikra seg med tida 1.11.31.